Ka surok ha thain Balakhawa la mynjur ka Hima, ong u bah Prestone

Shillong: Haba kyntait ba ka jingshna surok ka Assam kan dei ka jingthmu kam ia ka jaka, u Symbud Myntri rangbah ka jylla, u bah Prestone Tynsong u la ong ba ia ka jingshna surok ka Assam ha thain Balakhawa, Ri-Bhoi la shah hadien ba ka Deputy Commissioner, Nongpoh ka la leit jurip ar sien sha katei ka jaka.
Haba kren myn hynnin ka sngi, u bah Prestone u la ong ba ia kane ka surok, la dep ai No Objection Certificate (NOC) ruh da ka Hima Nongspung.
“Ia ka surok PMGSY ha thain Balakhawa la ai NOC da u Syiem ka Hima Nongspung katkum ka jingtip jong nga bad ka dei ka surok PMGSY ha kaba ka sorkar Assam ne ka sorkar Meghalaya ruh ki lah ban leh ia kata, namar ba ka dei ka skhim ka sorkar pdeng”, la ong u bah Prestone.
U la bynrap, “Na ka Hima Nongspung ka la ai ia ka NOC bad dei halor kane ba ka Assam, ka la sdang ia ka kam”,u la ong bad bynrap, lehse ka Hima kala ai namar ba ka pyrkhat ba ki shnong kim ioh surok bad ki paitbah kin ioh surok ha katei ka thaiñ.
“Ha kaba iadei bad ka jingshna ia ka surok PMGSY ha thain New Balakhawa, la leit jngoh da ka Deputy Commissioner ruh sha jaka bad hadien la shah ban shna ka Assam”, la ong u bah Prestone.
U la ong ba ia kane ka rukom ban shah ban wan ki kam pynroi na Meghalaya ne na Assam la bud katkum ka rai jong ka sorkar barim kaba la iadoi hapdeng u Myntri Rangbah u bah DD Lapang bad u Tarun Gogoi mynshwa, tangba ki dei ban iapyntip shwa wanrah ia kano kano ka kam pynroi.
U la iathuh ba ka sorkar ka la ai jingbit ha ki Deputy Commissioner ba kin iasam jingtip man ka por hapdeng jongki shwa ban wan rah ia ki kam pynroi.
Hynrei haba kylli ba ka don ka mukotduma halor kane ka surok ha Kashari, u la ong, “Ngam tip ba ka don ka mukotduma halor ka surok ha ka Kashari. Ka PMGSY kam mut ba ai ka Assam ne Meghalaya hynrei ka dei jong ka sorkar pdeng”, u la ong.
U Symbud Myntri rangbah u la pynpaw ba ka long ka jingjia kaba sniew bok ba ki pulit ka Assam, ki la wan kem ia u bah Michael Warjri un shah kem ha ki pulit Assam ha ka jaka ka Meghalaya.
“U Myntri Rangbah u Conrad K Sangma u la iakren ia u Myntri Rangbah ka Assam halor kane ka jingjia”, la iathuh u bah Prestone.
U la ong ba ki pulit ka Assam ki lah ban wan sha Meghalaya, kumjuh ki pulit Meghalaya ki lah ban leit sha Assam hynrei ki dei ban pyntip mar kylliang ym ban shu rung ne kem ia ki briew kumba jia ha New Balakhawa.
U la ong ruh ba ka sorkar ka la bthah ia ka bor synshar district, SP ba kin iashong para ma ki ban pynthikna ban wanrah ia ka suk ka sain ha katei ka thain.