Nongstoiñ: “Ka long kaba suk ban plie ia ka court, hynrei kaba eh mynta ka long ban plie pat ia ka jingbishar kaba hok” ong u bah H.S Shylla CEM ka KHADC haba ai jingkren ha ka jingialang plie ia ka iing bishar bad ia ka ophis Syiem jong ka Hima Rambrai Syiemship, ia kaba la tei lyngba ka jingiarap jong ka KHADC na ka Special Assistance Scheme 2015-16.
Shuh shuh u bah Shylla u la ong ruh ba katei ka iing bishar, kaba la plie ha katei ka sngi ka dei kaba la tip kum ka Aditional Subordanate District Council Court, ka District Council Court ka don ha Shillong ha kaba u nongbishar hangta u dei u judge ka apil na u ka leit sha High Court bad hapoh jong u Judge don u Aditional judge bad hapoh jong ka pat ka don ka subordinate kaba hapoh jong ka Subordinate District Council Court bad katei ka Court jong ka Hima Rambrai ka wan ha ka kyrdan kaba lai, kam dei shuh tang ka subordinate ka la dei ka Aditional Subordinate District Council Court kumta u la ai jing jingmut ba dei ban thoh ia kata ka kyrteng ‘Rambrai Syiemship Aditional Subordinate District Council Court’ ha katei ka iing.
U bah H.S Shylla u la kyntu ruh da kaba ong ba haba shong ban bishar kaba kongsan eh, ka dei ban nym lah ban lem mon dalade, hynrei ban iaid katkum ki kyndon jong ka ain bad ka kyndon jong ka ain kaba kongsan bha ka dei ka kata kaba ki ong ka “Principle of natural justice” kaba mut ba phim lah ban pynrem iano iano khlem da ai ka lad ba un ia sait ialade.
Ym tang katta u la iathuh ruh ba ia katei ka kashari, ka dei ka trail court, kaba mut ka jingsdang jong ka jingbishar bad ka sdang nangne ka lah ban kut sha supreme court bad lada don ki case kiba sdang na ka trail court ha kaba kut ka supreme court, ka pynskhem ia ka rai jong kane ka trail court, bad u la pynpaw ruh ia ka jing kyrmen ba ha ka wei ka sngi kan don ka case kaba u Syiem Rambrai bad ka kynhun ka jong u, un ai ka jingbishar, yn da la bishar phi leit aplil sha District Council Court bad ka poi sha High Court bad ka poi sha Supreme court bad na ka supreme court ki pynskhem ia ka rai jong ka Rambrai Syiemship Aditional Subordante District Council Court bad tang kane ka wei kaba ngi kwah ba ka jingbishar ka dei ban don ba ngin ioh nam kum ka jaitbynriew.
Ha katei ka sngi nalor u CEM ka KHADC la don lang ruh u bah O.Syiemsad syiem ka Hima Rambrai , u bah B.Nonglang Myntri Hima Rambrai, ki lyngdoh, ki sordar na ki shnong bapher bapher kiba hap hapoh katei ka Hima ki khun ki hajar katei ka hima bad kiwei kiwei.