“Ka sorkar pdeng kan pynbun ka jingmang pisa ia ka NEC”

Shillong, 14 Naiwieng:
U Myntri khynnah ka sorkar pdeng ba peit ia ka tnad pla tyngka bad Corporate Affairs u Arjun Ram Meghwal, u la ong ba ka sorkar pdeng kan sa pynbun noh ia ka jingmang pisa ia ka North Eastern Council (NEC) na ka bynta ba kan lah ban treikam kham bha ha ka Dong Mihngi.
Haba kren sha ki nongthoh khubor mynta ka sngi ha ka jingwan iuhkjat ha ka nongbah, u la ong ba mynta ka sngi u la pynlong ia ka jingbishar ia ki prokram bad ki kam jong ka NEC nalor kiba dang iaid bad kiban sa leh.
“La iathuh ia nga ia ki kam ka NEC khamtam ka jingpynleit jingmut kham hakhmat ha ka kam jngohkai. Ki don ki projek kiba iadei bad ka tnad jngohkai kiba la phah sha ka sorkar pdeng na ka bynta ban mang pisa ha ka mang tyngka ban wan”, u la ong.
U la iathuh ruh ba u la bthah ia ki ophisar ka NEC ba kin pyntreikam ia ka OFC (optical fibre cables) namar ba ka jingpyniar ia ka Digital India khlem ka jingpynbun ia ki tower mobile bad jingpynkhlain ia ka internet, ym lah ban pyntreikam ia ka DBT (direct benefit transfer) kaba jop.
U la ong ba ka lynti ka synkieng kum ka surok, ruh ka dei ka mat kaba kongsan eh ha kane ka thain. “Kano kano ka jingeh ba ki iakynduh ha ka jingpyntreikam ia ki surok, ki dei ban bishar bad peit bniah man ka lai bnai khnang ba ki kam kin nym thut ha ka jingpyntreikam”, u la ong.
“Kano kano ka jingdonkam pisa ki dei ban phah sha ka sorkar bad ki don kiba la phah ia nga bad ngan peit ban iakren ha ka tnad pla pisa ka sorkar, ha kaba ngin sa lah ban ai pisa khambun ia ka DoNER ba kan ai sha ka NEC khnang ba kin lah ban pyntreikam shaid shaid ia ki kam ha ka jingshna surok, ka digital India bad kiwei ki prokram ka sorkar pdeng”, u la bynrap.
U la ong ba ka Dong Mihngi ka dei kaba jur slap bha bad bun ki surok khamtam ba shna da ka BRO (border road organizations), don ba shna ka PWDs bad la bthah ia ki ophisar ban pynkhreh ia ka detail project reports (DPR) bad un sa pynmang pisa shuh namar ba u Myntri Rangbahduh ka ri u pynleit jingmut bha ia ka Dong Mihngi ba ka roi ka par ka dei kaba hakhmat.