“Ka sorkar pdeng kan nym pynduh ia ki district council”

Shillong, 08 Iaiong:
U myntri ka sorkar pdeng ba peit ia ka Pan chayati Raj, u la ong ba ka sorkar pdeng kan nym pynduh noh ia ki autonomous District Councils ha ka jylla.
U Nihal Chand Meghwal uba la wan ha ka nongbah Shill ong ha kane ka sngi Balang, u la ong ba ka sorkar pdeng kan nym pynduh da lei lei ia ki Autonomous District Council kiba don ha kane ka jylla Meghalaya.
“Ngim kwah ban pynduh ia ki District Council namar ba ka dei ka kam jong ka jylla bad nga la wan hangne ban iakren ia ki kam ka roi ka par”, u la ong haba kren sha ki nongthoh khubor ha Shillong hynne ka sngi Balang.
Wat la ka jylla Meghalaya kam shym la don ka panchayati raj,  u myntri ka sorkar pdeng, u la ong ba ka jingwan jurip ia ka nongbah Shillong ka lon kumno ki dorbar shnong ha Meghalaya ki lah ban pynskhem bad kumno ki donkam ban pynkhlain shuh shuh.
“Wat la hangne ki khot kyrteng ka District Councils, ngi lah ban khot kum ka  panchayati raj hi” u la ong bad bynrap ba ka jingthmu ba wan jurip ia ka Shillong ka long kumno ban peit bad haduh katno ka jylla ka la roi. U la ong ba ka sorkar pdeng ka kwah ba ka roi ka par ha kane ka jylla kan iaid sted bad bynrap ba ka sorkar pdeng kan ai ia ka pisa ia ki jingdonkam.
Halor ka jingioh duna pisa ka jylla na ka 14th Finance Commission bad ka jingbym bhah pisa ia ki autonomous District councils ha Meghalaya, u myntri u la kular ba ka pisa kan sa poi sha baroh ki jylla haba bad lada donkam. “Man la ki jylla kin ioh ia ka pisa, ki jylla kane ka thain bad ka Meghalaya ruh kin ioh ia ka pisa” u la ong. U la ong ba ka jylla Meghalaya kan sa ioh bhah na ka T.4500 klur namar ba u myntri rangbahduh u Narendr Modi u la rai ban pynkiew ia ka bhah pisa sha ki jylla na 32 percent sha ka 42 percent.