Ka Sorkar pdeng ka dei ban mynjur ïa ka MRSSAB, ka sorkar jylla, ong ka HYC

Shillong:Ka Hynñiewtrep Youth Council (HYC), ka la dawa na ka sorkar pdeng ban ai jingmynjur ïa ka Meghalaya Residents Safety and Security (Amendment) Bill (MRS SAB), 2020 katba ka dang shong bishar ïa ka Resolution ba la mynjur da ka Ïingdorbar ban pyntrei kam ïa ka Inner Line Permit (ILP) ha Meghalaya.

Haba kren sha ki lad pathai khubor hadien ka jingpymbam smai ïa ki dkhot ka central executive committee (CEC), u president ka HYC u Bah Roy Kupar Synrem, ula ong, lada donkam ban jied hapdeng ka ILP bad MRSSAB, 2020, ka HYC kan jied hi ïa ka ILP.
“Katba ka sorkar pdeng ka dang bishar ïa ka ILP, ngi dawa na ka sorkar pdeng ban ai jingmynjur ïa ka MRSSAB bad hadien kane ngin sa peit kumno ki kyndon ba la bsuh ïa ka Act ki treikam ne em katkum ka aiñ,” ula ong.

U Bah Roy, ula ïathuh ba shen ka CEC thymmai kan sa kynduh ïa u Myntri Rangbah ka Jylla u Conrad K Sangma ban buddien ïa ka MRSSAB.
“Ngi la ïohi ba ka tnat Ministry of Home Affairs (MHA) ka la pynphai ïa ka MRSSAB, 2020, kaba la ai jingmut da ka HYC sha ka sorkar Jylla ka ba long kum ka ILP. Namar kane ngin sa kynduh ïa u Myntri Rangbah ban buddien ïa ka MRSSAB bad ïa ki jingkylli ka tnat MHA,” ula ong.

U Bah Roy ula ong ba ka HYC kam kyrshan satia ban pyntreikam ïa ka MRSSA, 2016 namar kane ka aiñ ka long kaba khlem bniat (Toothless) kaba shu ailad tang ban lum jingtip ïa ki ba sah wai ha nongbah Shillong.
Kane ka wan hadien ba ka sorkar jylla ka la pyntreikam ïa ka MRSS Act, 2016 ha ki 7 tylli ki shnong ha sor Shillong.

U Nongïalam ka HYC ula ong ba dang shen ka Meghalaya High Court kala pynbna ba ki khyrdop ki long beaiñ namar katkum ka MRSS Act 2016 kam shym la ai bor ïa ka sorkar jylla ban pyntreikam ïa ki khyrdop.
“Namar kane, kim don satia ki khyrdop kiba treikam hapoh Meghalaya namar katkum ka MRSS act 2016 kam don satia ka kyndon ban ai bor ïa ka sorkar Jylla ban pynïeng ïa ki khyrdop. Namar kane ka HYC ka dawa ban pynkylla ïa ka MRSSA 2016 ka ban buddien ïa ka jingwan ne ka jingmih ki briew hapoh ka jylla,” ula ong.
Haba kynnoh ba ka khyrdop ha Umling ka long tang ban khring ïa ki briew, u Bah Roy ula ong, “Ka khyrdop ha Umling kam treikam satia, namar kam don satia ha ki kyndon ban ai bor ïa ka sorkar jylla ban pynïeng khyrdop. Lada khlem pynkylla ïa ka MRSSA, 2016, kam don satia ka khyrdop talasi bar jylla”.