Ka sorkar pdeng ka buh ha khmat ia ka Dong Mihngi, ong u myntri DoNER

Shillong,
26 Jymmang:  
U Myntri ka tnad Development of Northeast Region (DoNER) u Jitendra Singh u la ong ba ka sorkar NDA ba ialam ka BJP ka buh hakhmat eh ban pynroi ia ka thain Dong Mihngi.
Ngi la don ka North Eastern Council (NEC)  kaba pynkhlain ban pyniaid sted ia ki kam pynroi ha kane ka thain”, la ong u Singh haba kren sha ki nongthoh khubor hynne ka sngi Hatmajai ha nongbah Shillong.
U la ong ba ki skhim sorkar pdeng kin bteng beit la ngi ai kyrdan kyrpang ne em ia kane ka thain.
Katkum ka jingong jongu, ki skhim sorkar pdeng kin leit sha man ki jylla la ki ioh kyrdan kyrpang ne em khlem kano kano ka jingleh shiliang.  
“Ka kyrdan kyrpang, ym dei ban kulmar ha kaba iadei bad ki skhim pynroi ka sorkar pdeng”, la ong u Myntri ka DoNER.
Halor ka jingkylli, la ka sorkar pdeng kan ai kyrdan kyrpang ne em ia kane ka thain, u Singh u la ong,  ”Kane ka dei ka mat kaba iapher. Ym lah ban len ba ki myntri tangbah jong kane ka dong Mihngi khamtam na u myntri rangbah ka jylla Tripura u la buh ia kane ka jingai jingmut bad ka sorkar pdeng ka shim ia ki lad ki lynti halor kane. Hynrei ngam lah ban ong eiei namar ba kane ka kam hap ha ka tnad DoNER”.
Kham mynshwa, ki  jylla jong kane ka dong Mihngi ki la buh jingkyrpad ia ka sorkar pdeng ba kan ai kyrdan kyrpang ia kane ka thain.
Ki myntri rangbah jong kane ka dong Mihngi ki la shim ia ka rai baroh ban dawa na ka sorkar pdeng ba kan ai kyrdan kyrpang ia kane ka thain”, la ong u Myntri Rangbah ka Tripura u Manik Sarkar.
Ka jingdawa kyrdan kyrpang ia kane ka thain ka long ban pynioh jingiarap kyrpang na ka sorkar pdeng kaba dang sahdien”, la ong u Sarkar. 
Halor ka suk ka sain ha kane ka thai, u myntri ka DoNER u la ong ba wat ka tnad jongu kam peit ia kane hynrei ka jingsuk ka long kaba donkam na ka bynta ban pynlah ban pyniaid ia ki kam pynroi.
Lada ka jingiasiat ka jingiaumsnam ka don, phim lah ban pyniaid ia ki kam pynroi bad ngi sngew khia ia kane bad ka tnad kam pohiing ka ri ka la pynthikna ia ngi ba ka jingshngain ha ka jylla ka la kham bha ha kine ki sngi”, la ong u Singh.