Shillong: U General secretary ka UDP u Dr Jemino Mawthoh u la ong ba ka jingjop ka UDP na Ranikor ha kane ka elekshon shiteng samoi, kan nym don eiei ka jingiadei bad jingkhih sorkar, hynrei kan nang pynskhem shuh shuh ia kane ka sorkar MDA ba ialam da ka NPP.
Ki paidbah kiba ia lum lymbung ha ka step jong ka Lah Sngi U Blei ha Mawkyrwat, ban ap ia ka jing ia niew vote:Rupang
Haba kren mynta ka sngi, u Dr Jemino u la ai khublei ia ki paidbah ka Ranikor konstitwensi kiba la ai ka jingjop kaba don burom ia u kyrtong ka party u Bah Pius Marwein.
“Ka jingjop jong u Bah Pius kan nang pyniatylli ia ki paidbah, ia ki party bad khamtam ia ka Regional Party Alliance (RDA) kaba iadon lang bad ka HSPDP”, la ong u Dr Jemino.
Haba iadei bad ka khubor kaba la her shane shatai ba ka UDP ka lah lehse ban iathaw sorkar noh bad ka Congress, u Dr Jemino u la ong kam don satia kaba kum kata ka jingthmu na ka party.
“Kan nym don kum kata hynrei ka jingjop kan pynskhem ia ka sorkar MDA haduh ba kut ka samoi san snem”, la ong u Dr Jemino uba dang wan phai na Delhi, na ka jingialang kaba la khot da ka tnad Election Commission ka India.
Ha kajuh ka por, u Working president u Bah Paul Lyngdoh u la ong ba ka jingjop ka UDP na Ranikor ka long hadien 20 snem eiei ba ka seng riewlum kam ju jop shuh na katei ka jaka, hynrei kaba la wan jia ha kane ka kynti ba mynta.
U la ong ba ka jingjop kan pynkhlain ia ka sorkar MDA kaba u Myntri Rangbah u dei uba ka UDP ka la jied ban shimti ia kane ka shuki.