Ka sorkar kan hap ban bishar ia ka kyrteng u MDC shu sieh: HDR

Shillong, 2 Nohprah:
Hadien ba la thylli noh ki 7 tylli ki jaka jong ki MDC ha district Council, kawei ha JHADC bad 6 tylli ha KHADC u bah HDR Lyngdoh myntri ka tnad District Council Affairs ka sorkar jylla u la ong ba ia ka elekshon shiteng samoi hap ban pynlong beit hapoh ka 6 bnai katkum ka rukom bad iaken u la ong ba shen un sa ia kren noh ha ka jingialang ki kynhun myntri na ka bynta ka elekshon shiteng samoi ha ki 7 tylli ki MDC konstitwensi.Haba la kylli pat na u aiu un leh namarba dang shen u CEM ka KHADC u ba Pynshngaiñ N syiem u la pynpaw sha ki kotkhubor ba ka KHADC ka don hapdeng ka jingkyrduh pisa na ka bynta ban pynlong elekshon bad donkam ia u Lat ban ia syllok bad ka Council shuwa ban pynbna ia ka elekshon shiteng samoi, halor kane u bah HDR u la ong ba um don jingtip eiei ia ka jingkyrduh pisa ka distrit Council , “Nga khlem ioh jingthoh eiei na ka Executive Committee ka KHADC ba ka kyrduh pisa” ong u bah HDR Lyngdoh.Ha kaba iada bad u MDC shu sieh ha KHADC kaba la thylli noh hadien ka jingrisaiñ u bah Gabriel Wahlang , u bah HDR u la ong ba ka don ka jingiapher ha ka rukom sieh MDC ha GHADC bad ha KHADC, ha GHADC u la ong ba ka AD Rules ka kren shai bay n sieh ia u MDC katkum ka jingai jingmut jong ka Council, katba ha KHADC pat ka la kren shai ba ka shong ka mon u Lat. Ha kaba ia dei bad u MDC shu sieh ha KHADC u bah HDR u la ong “Ka sorkar kan hap ban shong bishar ia ka kyrteng u MDc shu sieh ba ka ioh pdiang”.
U bah HDR Lyngdoh u ba ju ia paralok bha bad u bah Pynshngaiñ ha ka por ba ki ia donlang hapoh District Council u la kynthoh ba um shym la iohi tang shisien ruh ia u bah Pynshngaiñ ba un wan iarap ne ban kanbas na ka bynta u kyrtong ka seng Congress ha ka elekshon shiteng samoi ha Nongstoiñ konstitwensi. Ha kaba idei bad ka jingkynnoh ba u bah Pynshngaiñ kyrshan ia ka kong Fenella L Nonglait u bah HDR u la ong um don jingtip eiei ia kata.  “Nga dei u dkhot ba shisha bad uba shimkhia jong ka seng bad haba ka seng ka pynieng ia u kyrtong ka dei ka kamram jong nga ban leit iarap ia la u dkhot” pynkut u bah HDr Lyngdoh haba ia kren bad ki lad khubor.