“Ka sorkar kam lah ai skhim nongrep, khlem pyntip sha ka KHADC”

Shillong,25 Nailar:
U CEM ka KHADC u bah Ardent M Basaiaw moit, mynta ka lah sngi u Blei haba kren sha ki nongthohkhubor u la pynbna ba ka KHADC kan phah da ka jingthoh sha ka sorkar jylla ba kam dei ban ai skhim ia kano kano ka seng ki nongrep la ka long na kano kano ka tnad sorkar khlem da pyntip sha ka District Council. “Ki Seng nong rep kin ym lah ban pan skhim nangno nangno ruh. Ngin phah da ka jingthoh sha ka sorkar ba kam dei ban ai skhim ia ki seng nongrep khlem da pyntip sha ka District Council, la ka long na kano kano ka tnad” ong u bah Ardent M Basaiawmoit, haba kren sha ki nongthohkhubor ha kamra treikam jong u.
Katei ka rai jong u CEM ka KHADC ka la mih dei hadien ba ka la mih ka huri hura hapdeng ki ar tylli ki shnong ka Thyllaw bad ka Mawlongbna kiba ka KHADC hadien ba ka la wad bniah ia ki daw tynrai jong ka huri hura ka la lap ba ka dawbah ka dei namar ka jingwan rah ia ka skhim sorkar ha ki jaka rep ki paidbah, kaba kham mynshuwa ki nong Thyllaw ki la kynnoh ba ka jingmih ka huri hura ka dei namar ka jingpyniaid ia u Pipe um jong ka Mawlongbna kaba la wan lyngba ka Water Resources kaba ki la kynnoh ba ka Mawlongbna ka la pyniaid na jaka rep ki nong Thyllaw.
U bah Ardent u la ong ba haba jia kum kitei ki jingjia ba sngewsih hapdeng u paidbah, dei ka KHADC kaba hap ban wad ia ka lynti ban weng ia ki jingeh ki paidbah, “Haba jia kum kitei ki jingjia ha kaba kut dei ka District Council kaba hap ban leit ban weng ia ki jingeh, kam dei ka tnad sorkar ka ban leit” ong biang u bah Ardent. Haba kren sha ki nongthohkhubor hadien ba la wai ka jingiakynduh hapdeng ki ar shnong ka Thyllaw bad Mawlongbna bad ki ar Hima/Elaka Dwara Nongtyrnem Sirdarship bad Mawsynram Syiemship, u bah Ardent u la pynbna ruh ba ka KHADC kan ym shah shuh ia ki Seng Nongrep ba kin wad skhim khlem ioh bor na ka shnong bad ka District Council.