Ka sorkar kam ju pynlong tamasa, ka shu iarap, ong U Mukul

Shillong, 24 Lber:
U myntri rangbah ka jylla u Dr Mukul Sangma u la ong ba ka sorkar kam ju pynlong tamasa, hynrei ka shu ai jingkyrshan bad iarap ia ki seng, ki kynhun kiba pynlong ia ki. Ia kane u Dr Mukul u la kren ha iing dorbar halor ka jingkylli ba la wanrah da u MLA ka Nongkrem u bah Ardent M Basaiaw-moit mynta ka sngi, uba la buh jingkylli la ka sorkar ka ju pynlong tamasa ne em.
U Myntri Rangbah u la ong ba ka sorkar ka ju ai jingkyrshan ia ki kynhun kiba pynlong ia ka tamasa ryngkat ka jingiatreilang bad ka bor synshar district bapher bapher bad tang ha u snem 2016-17, ka sorkar ka la pynlut T. 1,18,06,200 ha ki kam tamasa ha ka jylla.
U Dr Mukul u la ong ba ia kine ki tamasa la kyrshan pisa da ka sorkar katkum ka jingpan jongki da kaba pynshnong nong-rim katkum ka jingdon-kam. Ka District Arts Society kaba khlieh da u Deputy Commissioner ka peit ia ki jingpan pisa jong ki kynhun ba pynlong ia ki tamasa ha ki district jongki, la ongu Myntri Rangbah. U la ong ba kiba kwah ban pynlong ia ki tamasa ki hap ban thoh aplikeshon sha u Deputy Commissioner ban ioh jingmynjur.
Na ka liang u Bah Ardent u la ong ba ka sorkar ka dei ban thaw ia ki kyndon kiba biang haba ai jingmynjur, ban pynlong tamsa namar ba bunsien ki tamasa ki kylla long ki kam pynjah burom namar ka jingiadih kyaid, ka jingialeh ki kam bym lah ban pdiang. “Nga la ioh jingujor na ki paidbah ba ka jingpynlong ia ki tamasa ka jingpynwit bad pynjah burom namar ba la mih ka jingiadih kyiad pathar, ka jingleh khlemakor ba lait phew jait”, la ong u bah Ardent.
U la kyntu ia ka sorkar ba kan bishar bniah bha ia kane khnang ba kan nym long ka kam pynjah burom ha kaba u Myntri Rangbah u la kular ba ka sorkar kan peit bad bishar ia ki bynta ba dei halor kane.