Ka sorkar kaba leh khongpong khongdeh, ong u Bah Bindo

Shillong, 14 Iaiong:
U Senior Working President ka UDP u Bah Bindo M Lanong u la ther ia kane ka sorkar MUA-II kaba pynslem ban pynlong ia ka elekshon MDC shiteng samoi wat hadien hynriew bnai ba ka jing risain jong ki 7 ngut ki MDC ka la iaid haduh mynta.
“Ka jingpyneh u Bah Pynshngain N Syiem ban nym risain na ka kam MDC, ka la pynlong ia ka sorkar ban buh jingeh”, la ong u Bah Bindo.
Hynrei u la takrain ia ka Congress kaba la pynslem ia ka jingpynlong elekshon da kaba ong, “Ia u briew lajong jongka, kam pat ban pynbeit, katba ia kiwei la phah risain wut wut”.
U Bah Bindo u la ong ba kane ka jingleh kane ka sorkar ka dei ka jingpynkhein ia ka hok jong u paidbah namar ba ha kito ki konstiwensi ba la risain ki MDC, ki la shu sah kumto khlem nongmihkhmat, kaba dei ka hok jong u paidbah.
“Kane ka dei ka sorkar kaba leh khongpong khongdeh lut ia ki kam namar ka kren da kumwei ka leh da kumwei”, u la ong u Senior Working President ka UDP.
Katkum ka jingong u Bah Bindo, ban phah risain ia u Bah Pynshngain ka dei ka kam iing jong ka Congress kaba dei ba kin iapynbeit hapdeng jongki, hynrei kaei ka jingeh ba kam lah ban pynbeit ia ka kam lajong jongki, kaba la buh pat ia u paidbah ha ka jingjynjar.
“Kane ka dei ka jingphiel ka sorkar, bad kam dei shuh ban pynslem hynrei ka dei ban pynlong noh ia ka elekshon shiteng samoi khlem pynslem shuh khnang ba ki paidbah kin ioh ia ka hok jongki”, la ong u Bah Bindo bad bynrap ba lada ka sorkar ka leh kumne, kan pyniap noh ia ka synshar paidbah.
Ki 7 ngut ki  MLA kiba long MDC kiba la iehnoh ia ka kam MDC  na ka KHADC ki long Bah HDR Lyngdoh, Bah Ardent Miller Basaiawmoit, Bah Sanbor Shullai, Bah Metbah Lyngdoh, Bah HB Nongsiej, Bah KP Pangniang bad Bah Stephanson Mukhim ka JHADC.
Lah ban kdew ha ka 7 tarik Risaw, 2015, u Lat ka jylla u V Shanmuganathan u la ai ia ka jingmynjur ia ka Bill khang bam ar maloi ki MLA ka Prevention of Disqualification (Members of the Legislative Assembly of Meghalaya) Amendment Bill, 2015.