Ka Sorkar ka shah ia ka jingiaid Christmas Carol da ki Balang, ong u bah Prestone

Shillong: U symbud myntri rangbah ka jylla u bah Prestone Tynsong, ha ka sngi nyngkong u la pynshai ba ka sorkar ka shah ia ka jingiaid Christmas Carol jong ki Balang bapher bapher, hynrei ka sorkar ka khang pyrshah ia ka jingpynlong ia ka iaid Chrismas Carol da ki riew shimet khlem kano kano ka jingtip jong ki Balang.

Haba ia kren bad ki lad pathai khubor, na ka liang jong u bah Prestone, u la iathuh ba ha ka jingshim rai jong ka sorkar jylla halor ka jingiaid Christmas Carol, ka la don ka jingia sngewthuh bakla ha kaba ka sorkar ka shah ia ka jingiaid Christmas Carol ba la pyniaid da ki balang bapher bapher ha ki jaka ki ba ki balang ki la pynbeit.

U la ong ruh ba ki Balang bapher bapher ha ka jylla baroh kawei, haba ki la buh ia ka program lehkmen Christmas, kaba kynthup ia ka jingiaid Christmas Carol, ka sorkar kan shah; hynrei ki Balang bapher bapher kin hap ban pan jingbit na ki Deputy Commissioner.

U la ong ruh ba na ka liang jong ka sorkar jylla ka la khang ia ka jingiaid christmas Carol jong ki riew shimet ki ba pynlong ia ka jingiaid Christmas Carol da ki ar shaka da ki kali na kawei ka shnong sha ka wei ka shnong khlem kano kano ka jingtip ne ka jingkit khlieh na ka Balang bapher bapher.

U la ong ba ka jingiaid Christmas Carol pathar da ki riew shimet, khlem kano kano ka jingtip jong ki balang ka sorkar, yn ym shah namar ba kane ka jingiaid Christmas Carol ki riew shimet kan ym don kano kano ka jing kitkhlieh ban bud ia ki Protocol bad kane ka lah ban wanrah ia ka jingma ia baroh.

Halor ka jingkynthoh ia ka jingshah ban bret blei u la ong ba ka sorkar ka shah namar ba kane ka hap ha ka jingpyniaid jong ka Puja Commitee, ha kaba ka la pynbeit ia ka protocol bad ha ka ba ia dei bad ki program ban lehkmen Christmas ha ki Balang bapher ka sorkar ka shah namar ba la shimti ki balang ban bud ia ki Protocol.

U bah Prestone u la ong ba ia ka bam khawai Christmas ka sorkar kan ym shah, namar ba ha ka ba ia dei bad ka jingpynlong ia ka jingiaseng la ailad ban pynlong tang 1/3 ia ki briew, hynrei ia ka bam khana, yn ym lah ban shu jied 1/3 ia ki briew ki ban wan shim bynta ban bam khawai Christmas.