Ka sorkar ka phah ïa ngi sha skul da ka kpoh ba thylli, ka pynshah jyngit ïa ki khun jong ngi, ong U Babu Peter Thyrniang

Nongstoiñ: Ki nonghikai skul SSA kiba don hapoh ka shatri jong ka AMSSASTA Nongstoiñ Block, mynta ka sngi ka 20 tarik u Risaw kila ia mih ban leit tur sha ka ophis jong ka District Mission Coordinator (DMC) SSA WKH, na ka bynta ban pynpaw ia ka jingpyrshah halor ka jingshah set tulop ka jong ki mynta la palat 4 bnai.

Ha kane ka sngi ki nonghikai SSA kila ia mih kynthei bad shynrang ha ryngkat ki jingthoh ban dawa na na ka sorkar ba ka dei ban pyllait noh ia ka tulop baroh 4 bnai tam kaba la sahkut naduh u bnai Jylliew mynta u snem.

Haba iakren sha ki lad pathai khubor u babu Peter Thyrniang, Vice President AMSSASTA Central Body ula ong ba ka sorkar ka dei ban pynlait noh ia baroh ka tulop kaba sahkut bad kam dei ban pynlait tang na ka bynta 1 bnai ne ar bnai.

“Ka sorkar ka iakren ia kata ka education policy lane kata ka quality of education hynrei ka phah hikai ia ngi sha ki skul da ka kpoh kaba thylli bad ka pynshah jyngit ruh ia ki khun ki kti jong ngi da kaba set tulop”, la ong u bah Thyrniang.