Shillong: Kumba la kdew ha u kyrwoh sha ki lad pathai khubor ba dang shen, ba na ka liang ka Voice of the People Party ka la sngewdei ban ai ïa kane ka sorkar ka jingshaniah ba ka don ia ka jingthmu kaba khuid (the benefit of the doubt) ha kaba ïadei bad ka jingpyrshang ban pynbeit noh ïa u pud u sam bad ka jylla Assam. Dei na kata ka daw ka party kam shym la kwah satia ban ai ia kino kino ki jingkynthoh kiba lah ban wanrah ïa ka dur ka dar jong ka jingleh politik ha kaba ïadei bad kane ka kam. Hynrei, hadien ba la dep ïasoi ïa ka soskular sngewthuh jingmut (MoU) bad ka jingpynlait paidbah sha ki lad pathai khubor ïa ki soskular ba la ïasoi, ka Voice of the People Party ka sngew ba ka dei ka kamram bad ka deiti jong ka ban kren ïa kane ka mat, ha ryngkat ka kyrwoh kaba shai ba ka party kam mynjur ne pdiang satia ïa kane ka kam ba la pynbeit hapdeng ka sorkar Meghalaya bad ka sorkar Assam.
Ka sorkar Meghalaya ka la kular ruh sha ki paidbah nongshong shnong ka jylla ba na ka liang ka sorkar Meghalaya ka la shim da ka sienjam ba ka jingiapynbeit kan long halor ka nongrim jong ka “Ai bad Shim markylliang ia ki jaka kiba don ha ki bynta khappud jong baroh artylli ki jylla. Namarkata, ngi khmih lynti ba ki ar jylla kin pynkhreh ia ki kyrteng ki shnong ba dei ban leit na Meghalaya sha Assam bad kiba dei ban wan na Assam sha Meghalaya. Hynrei, phewse hadien ba la pynlait paidbah sha ki lad pathai khubor ïa ki kyndon ba la ïa mynjur la lap ba tang ki shnong kiba hap ha Meghalaya kin leit noh sha Assam. Nangta shuh shuh kaba kham pynshaiong ka long ba wat kito ki jaka ki bym ju don satia ka jingkajia bad kiba hap beit ha Meghalaya, kat kum kane ka soskular la rai pynban ban ai noh sha Assam. Kane ka pyni shai ba kane sokar ka la lilam im im peit peit ïa ki jaka jong ngi sha Assam”.
Kane ka jingleh jong ki nongialam kane ka sorkar kaba mynta ka la wanrah ia ki jingpynrem bad jingbym sngewhun na kiba bun ki liang bad ruh ka la pynbitar tyngeh ïa ki paidbah kiba shong ha ki jaka khap pud. Dei halor kine ki nongrim ba ka Voice of the People Party (VPP) ka don ban pynshai ba kan nym lah ban pdiang ïa kane ka soskular. “Ngi kwah ruh ban pynsngew da kaba shai ïa u Chief Minister Shri Conrad Sangma bad ia u Deputy Chief Minister Shri. Prestone Tynsong ba ki jaka kiba hap ha ki bynta khap pud kim dei satia ki nongkynti jong ki shimet bad kumta kim lah satia ban shu rai katba ki sngewmon ma ki” ong ka kyrwoh na U bah Ardent M Basaiawmoit, President, Voice of the People Party.
Ka biang eh ka Nongrim jong ka VVP