Ka sorkar ka la leh aiu, ba byrthen ki nongialam ka KSA, kylli u ba Ardent

Shillong:U MLA ka liang pyrshah na Nongkrem uba dei u president ka Voice of the People Party (VPP), u Bah Ardent M Basaiawmoit u la buh jingkylli ia ka sorkar halor ka jingbyrthen ka Karbi Student’s Association (KSA), ba kan mih ka jingjia kumba jia ha Manipur lada ki duh ia ka jaka. U la ong, hato ka sorkar ka la leh aiu hadien ba la iohi ia ka jingkynthoh bad hato ka la iakren ne em bad ki bor Sorkar na Assam ban pynthikna ba ka suk ka sain kan neh ha khappud.

Haba wanrah ia ka mat iatai lyngba ka ‘zero hour’, u MLA ka liang pyrshah u la ong ba kane ka rukom kren jong ka KSA ka long kumba ai ding ban iakynad bad bynrap ba kane ka jingkren da ki nongialam ka KSA ka lah ban wanrah ka jingshah ktah ha ka suk ka sain ha khappud ka Assam bad Meghalaya, ha kaba u la kdew ruh ia ki kyndon aiñ kiba lah ban shah pynshitom haba pynmih ia ki jingkren pynshit.
Haba jubab halor kane ka mat, u myntri rangbah ka jylla, u Conrad K Sangma u la ong ba ia kane ka jingkren jong ka KSA wat u Myntri jong ka Sorkar Assam uba dei ruh u Chairman ka regional committee, u Pijush Hazarika um iahap satia.

U Conrad u la ong shuh shuh ba ia mynta la pynjur ka jingpeitngor ha ka thain khappud kaba don ha Khanduli, bad la pynkhlain ia ka jingiaid pahara ha ka thain ban iada na kano kano ka jingjia pynkhein ain kaba ktah ia ka shong suk shong sain.

U la ong ba ha ka jingwan jong u Myntri Rangbah ka Assam bad u CEM ka Karbi Anglong Autonomous Council sha Shillong dang shen, la iasyllok halor kane ka phang ha kaba yn rah pat ha ka jingiakren pynbeit pud ka ban long ha u Risaw ban wan ban shim ia ka rai kumno ban iaid shakhmat, bad hadien kata yn leit ruh ban iakynduh ia ki paidbah ha ka thain khappud.