Ka sorkar, ka la khang lut ia ki karkhana shna coke beain, ong U MR

Shillong:U Conrad K Sangma, myntri Rangbah ka jylla, ha ka sngi ba la pynkut noh ia ka taiew ban rakhe ia ka jingpyn neh pynsah ia ka mei mariang, u la iathuh ba na ka liang ka sorkar ka la dep ban khang lut ia ki coke factory, kiba pyntrei beaiñ ha baroh kawei ka jylla bad ki coke factory kiba don mynta ki dei tang kito kiba biang ki kot ki sla.

Haba ia kren bad ki lad pathai khubor, u Myntri rangbah u la ong ba ka jing pyntrei ia kano kano ka kam ka long ba yn lah ban pynia biang halor ka ioh ka kot bad kumjuh ruh ban sumar ia ka mariang bad ka sorkar ka phikir ia kane, dei na kane ka daw ba na ka liang ka sorkar ka la buh ia ki kyndon ban buh ia ki factory.

U la ong ruh kumba ka long mynta hi, ha ka jylla, ka sorkar ka la dep ban phah khang lut ia kito ki coke factory kiba pyntrei beain bad kiba la shah ki long tang kito ki coke factory ki ba biang ki kot ki sla.
“Ka jingpyndonkam da ki kor kane ka juk ba mynta kan iarap shibun,hynrei kiba beaiñ la khang lut bad lada don kiwei ruh kiba pynkhein yn ym ailad ba kin treikam”u la bynrap.

Ka Sorkar jylla mynta ka sngi ka la pynkut noh ia ka ïa ka jingrakhe ia ka taïew ba kyrpang halor ban pynneh pynsah ia ka ïa ka mei Mariang,ha ka jingïadonlang u Myntri Rangbah ka Jylla u Conrad Sangma kum u Kongsan,ha ryngkat u myntri ka sorkar jylla u James PK Sangma,ki ophisar na ki tnat bapher bapher, ki Nongïalam shnong bad ki wei kiwei.

Haba kren ha kane ka sngi, na ka liang u Myntri Rangbah ka jylla u Conrad Sangma, u la kyntu ia ki paidbah, ba ki dei ban sumar ia ka mei mariang, bad kaba donkam tam ka long ba ki paidbah ki dei ban kiar, na kaba pyndon kam ia ki plastic.
U Myntri rangbah, u la iathuh ruh ba ka sorkar ka la pynlut da ki spah klur tyngka, na ka bynta ban pynneh ia ka Mariang ha ki bynta bapher bapher.
Ha kane ka sngi la ioh ruh ban kren da u Myntri ka sorkar jylla U James PK Sangma halor ka phang kaba ïadei bad ka jingpynneh pynsah ïa ka Mariang.

Ha kane ka sngi la pynphuh pynphieng shuh shuh ïa kane ka programe da ki jingrwai bad ki jingpyni ïa ki sap ki phong na ki samla.
Ha kane ka sngi la ioh ruh ban sam ïa ki song pisa bad ki syrnot sha ki sh?ong bapher bapher kiba la trei ban pynneh pynsah ia ka Mariang bad ruh ban pynneh pynsah ia ki umbam umdih.