Da u Ex.Rev.K.Langrin, Seinduli, WKHD.
Ka sorkar Meghalaya ka la dei ban rah ha ka dorbar Assembly ia kawei ka mat thymmai ban iatai, kata ka long kumno yn leh ia kito kiba ju kynthoh sniew bad ba ju kren bein para jaitbynriew. Ngi la ju iohi ha ki facebook ba ki don ki khasi kiba isih ia ki para khasi da kaba ki ju kynthoh da ki ktien sniew bad khlem akor.Kiba kum kita imat ki sngewtynnad eh ban ialeh thma para khasi; bad ba ki kwah ban ka ri khasi kan nang rit suki suki.
Ngi la ju iohi ia ki briew kiba bang tang ban kynthoh sniew bad pynjah burom ia kiwei.Ym tang ia ki riew paidbah hynrei ngi iohi ba ki kynthoh sniew bad thad wat ia ki minister sorkar. Ngi ki riewwtymmen te ngim kwah ban iohi ia ki ktien khlem akor ba mih na ki riew khlem akor.
Kaba kham ma shuh shuh ka long ba ki la iai mih kita ki padiah khlem baiwai, kiba shu kynnoh kulmar ia ki paradoh para snam da ki ktien kiba sniew ba ka imlang sahlang kam lah ban pdiang. Tang ha kine ki bnai corona ruh ngi la iohi bun ngut ki khasi kiba kynnoh khlem daw ia ki Lyngngam da kaba ki ong, “lyngngam bam briew”. Lada kita kiba kynnoh kumta ki lah ban pynshisha ia ka kyrteng jong u nongbam, uba shah bam, ka tarik bad ka jaka bam te ym leilei. Hynrei lada kim lah ban pynshisha ka mut ba ki kwah eh ban ialeh thma para khasi; bad khlem artatien kan poi ka por ba shi bynta ka khyndew jong ka ri khasi kan syntuid noh sha sepngi khlem slap.
Te ha shuwa ba kan jia ka thma para khasi bad ba ka khyndew kan syntuid noh shathie sha sepngi, hato kam bha mo ba ka sorkar kan iakren bad iatai sani bha ha ka dorbar Legislative assembly ba ia kiba ju kynthoh khlem akor bad kiba ju kren bein ia kiwei dei ban kem, set patok bad shain kuna. lada ka sorkar kam lah ban teh lakam, kitei kiba nga la ong kin sa urlong shisha ha kawei ka sngi.
Phi don ban ong eiei?