Shillong: U myntri rangbah ka jylla, U Conrad K Sangma, haba jubab ia ka mat jingiakren, ba la wanrah da u bah PT Sawkmie MLA ka Mawlai Constituency, halor ka Mawmluh Cherra Cement Limited; u la ong ba ka sorkar ka la pynkhreh ban pyntrei kam da ka joint venture na ka bynta ban sdang noh ia ka karkhana pynmih dewbilat ka MCCL.
Haba jubab ia kane ka mat, u myntri rangbah ka jylla, u iathuh hapoh ka ingdorbar ba ban iarap ia ka ne ka karkhana dewbilat ba kan long ban trei kam bha ka don kam ia ka jingbei pisa ka ban long T.190.32 klur bad na ka liang ka sorkar jylla kan ym lah ban bei ia kane ka pisa.
U la iathuh ba ha ka 22 tarik u Naitung 2020 u Myntri rangbah u la pynlong ia ka jingialang ha ryngkat ki MLA, kane ka thain, u MDC bad ki ki trai shnong jong ka thain, ban twad jingmut ban ioh ia ki lad ki lynti ban lah biang ban sdang biang ka jingtreikam ka MCCL.
La iathuh ba kat kum ka jing tohkit, kaba la pynlong ha ka Nailar 2019, ba ban sdang biang ia kane ka karkhana pynmih dewbilat ka donkam ia ka bei pisa ka ban long 190.32 klur; hadien kane ka jinglap ka sorkar jylla ka la wanrah ia ki lai tylli ki lad ki lynti na ka bynta kane ka karkhana, kawei ka long ban sdang thymmai ia ka MCCL ha ka jinglut kan long 190.32 klur,ban khot da ka joint venture lane ban khangdam noh ia kane ka MCCL.
U Myntri rangbah u la iathuh hapoh ka ingdorbar ba ha ka 24 tarik u Nailur 2020, la pynlong biang ia ka jingialang ban shim ia kawei ka rai ha kaba iadei bad ka MCCL bad na kine ki lai tylli ki lad la jied da ka joint venture ban pyntreikam biang ia ka MCCL, namar ba ka sorkar kam lah ban bei ia ka pisa kaba long 190.32 klur bad kan ym lah ruh ban khang khyrdep noh ia kane ka plant. Ula iathuh ba ka sorkar jylla ka dang pynkhreh mynta ia ka dorkhas ban ai da ka joint venture ban sdang ia ka MCCL bad ia kane yn rah ha ka jingialang jong ki kynhun myntri ban ioh ia ka jingmynjur.
U Myntri rangbah u iathuh ba ka MCCL kaba la sdang ha u snem 1955 ban pynmih ia ka dewbilat ka ba long 250 TPD bad hadien, ka la pynheh sha ka 340 TP ka jingpynmih ka dewbilat ha kaba ha u snem 1990 ka MCCL ka la sdang ban kiew ha ka ioh ka kot, hynrei ha u snem 2007 ba ka MCCL ne ka karkhana pynmih dewbilat ka la sdang ban mad ia ki jingjynjar ha ka ioh ka kot ha kaba kam lah shuh ban pynmih na kane ka plant. La iathuh ba naduh u Nailar 2006 sha jrong ka company ka la sdang ka jingpyntrei ia ka 600 TPD dry process plant bad kane ka la long ka ba jlan ha kaba kane ka plant ka la sdang naduh ka 26 Nailar 2016, ha ka jinglut ka ba long 142.97 klur.
La iathuh ba ka jing thaw ia kane ka dry plant ka long ban pynmih 1.8 lakh metric tonne, u dewbilat ha ka shisnem ha kaba la khmih lynti ba kane ka plant kan pynmih 15000 MT shibnai, ha ka ba kane ka karkhana kam shem la lah ban urlong kumba la thmu bad ha ki 3 snem kane ka karkhana ka pynmih tang 14,000 MT ha kaba wat tang ka bai pynlut ruh ym shem la lah ban pynmih. U Myntri rang bah u la ong ruh ba ka lah ban long ba ka daw bah ba kane ka karkhana, ka kylla sha ka jingbym lah ban pynbha bad la jingbymdon ka jingtip bad ka jingtbitl ban pyniaid ia kane ka dry plant. La iathuh ba na ka liang ka sorkar jylla ka la iarap ia kane ka karkhana ban pynioh ia ka pisa ban sdang biang ia kane ka plant ha u snem 2014-15 bad haduh 2020 21 ka sorkar jylla ka la bei haduh 177.50 klur, hynrei kane ka pisa kam shem la lah ban iarap ban pynim biang ia kane ka karkhana.
Phi don ban ong eiei?