Ka sorkar ka kwah ban tih dewiong da ka juk stad saian

Shillong: U Lat ka jylla u Tathagata Roy u la ong ba ka sorkar ka la kut jingmut ban tih ia u dewiong bad ki marpoh khyndew da ka juk stad saian bad ka ban nym ktah ia ka mariang ha ka jylla, da kaba bud ia ki kyndon ain ka sorkar bad ban buh ruh ia ka jingshngain jong ki nongtih paw.

Ha ka jingkren ha ka sngi sdang ka dorbar mang tyngka ka jylla, u Lat u la ong ba ka sorkar ka la pyrshang ban weng ia ki jingeh jong ka jingshah khang tih dewiong bad ban pynskhem ia ka rai jong ka kashari Supreme Court ia ka hok jingling trai ia ka khyndew ka ka shyiap jong ki riew shimet ha kane ka jylla.

U la ong ba ka Kashari ka la shah ban tih dewiong katkum ka kyndon Mines and Minerals (Development & Regulation) Act, 1957 bad ka Mineral Concession Rules, 1960 kaba don ka mining plan bad katkum ka Mines Act 1952 bad ka Coal Mines Regulations 2017.

Ha kajuh ka por, u la ong ba ka sorkar ryngkat ka jingiasyllok bad ki stad ki jhad, ka la pynlong ia ka jingpynshai paidbah halor ka rukom tih dewiong kaban iadei dur bad ka jingiada bad pynneh ia ka mariang.
Ia kane ka jingpynshai paidbah la pynlong ha West Jaintia Hills ba la wan iashim bynta ki trai par, ki nongtih dewiong bad ki nongshong shnong ba kin tip shaphang ka jingdonkam katkum ka MMDR Act, 1957 bad ka Mineral Concession Rules, 1960.
U la ong ba ka sorkar ka la lum 10 per cent na ka jingshalan ia u dewiong katkum ka hokum ka Supreme Court bad ka NGT bad ka la buh ia kane ka pisa ba la ioh sha ka Meghalaya Environment Protection and Restoration Fund (MEPRF) ban pynbha biang ia ki jaka ba la tih dewiong.
“Ka sorkar ka la pynkhreh na ka bynta ban pynwan dur biang ia ki jaka ba la mong na ka jingtih dewiong bad la sdang ruh ha ki katto katne ki jaka”, u la ong.
U Lat u la ong ba ka sorkar jylla ka la pynbna ia ka jingpyntreikam ia ka pisa na ka MEPRF.
U la ong ruh ba ia ka District Mineral Foundation la dep pynbna bad pyntreikam ha ki 8 tylli ki district ban pynthikna ban iada bad kiar na kaba pynjot ia ka mariang na ka jingtih dewiong bad kiwei ki marpoh khyndew.