“Ka sorkar ka hap ban thaw ain ia ki Rangbah Shnong da ka jingbym banse”

Shillong, 04 Risaw:
U Chief Secretary barim ka jylla u Bah WMS Pariat, u la ong ba ka jingmih ka kynrum kynram ha kaba iadei bad ka kam Rangbah Shnong hadien ba la sloit iktiar ka Meghalaya High Court ka dei namar ba ka District Council ka la bakla naduh mynshwa ban pynbeit ia kane ka kam.
Haba iakren bad u Rupang ha kane ka sngi Saitjain, u Bah Pariat u la ong, “Kaba kongsan ba ka District Council ka dei ban leh naduh mynshwa ka long ban pyn rung ne ithuh (codify) ia ki riti dustur ha ka rukom pyniaid kam pyniaid jam bad ka syn shar ka khaddar”.
“Ki la bakla naduh mynshwa, ki la dei ban kodiphai (Codify) ia ki. Jin lada ki la leh ka jingeh kan nym mih satia”, la ong biang u Bah Pariat.
U la ong ba namar ka jingbym lah ki district council ban pyndep ia kane ka kam, ka la pynlong ia ka sorkar jylla ba kan shimti hi noh ia ka kam da ka jingbym banse satia. “Ka sorkar jylla ka la hap ban shimti ban pynkhreh ban thaw ain ia ki Rangbah Shnong da ka jingbym banse ban pynbeit noh ia kane ka jingeh kaba donkam kyrkieh”, la ong u Chief Secretary barim ka jylla.
Katkum ka jingong u Bah Pariat, jin lada ki district council ki la leh ia la kamram, kan nym pynlong ia ka sorkar jylla ba kan tuklar ia kane ka kam. “Imat ka sorkar jylla ka la iohi ba kim lah ban leh ia kane ka kam, ka la hap ban shimti noh halade”, u la ong.
U la ong ba ka jingiakhih halor kane ka kynrum kynram ban pynkup bor ia ki Rangbah Shnong  kam dei ban iakhleh bad ka sain pyrthei, namar ba kane ka wanrah ia ka jingsniew  dur ia ka imlang sahlang.
Ha kawei ka liang, u CS barim ka jylla u la ong ba ka Meghalaya Development Authority (MUDA) ka donkam ban peit ban khmih ia ka rukom shna iing, namar ka jingshngain. Wat sha kito ki jaka ba don shabar u pud u sam ka MUDA, ruh dei ban bud ia ka jingshna iing shna sem katkum ki kyndon ba la buh da ka MUDA.
“Ha ka jingsngew jong nga, ka MUDA ka donkam ban pyntreikam ia ki kyndon shna iing namar ba kane ka long kaba donkam ban wanrah ia ka jingshngain”, la ong u Bah Pariat.
“Wat sha ki jaka ba don shabar u pud u sam ka MUDA, kane ka tnad ka dei ban ai ia ka jingbthah ba dei ban bud ia ki kyndon shna iing katkum ba la buh da ma ka”, la ong shuh shuh u Bah Pariat.
U la ong ba ka jingpyrshah bad ka jingthnum ki paidbah ia ka MUDA ka dei tang namar ba ka rukom pyniaid ka lah ban dei lehse kam long kaba iaid ryntih. Katkum ka jingong u Bah Pariat, kane ka tnad ka sorkar jylla ka dei ban pynbeit bha ia ka rukom treikam jongka khnang ba ki paidbah kin nym iakynduh jingeh.