Shillong,7 Naitung:
Mynta ka sngi ka Khasi Hills Autonomous District Council (KHADC) ka la lum ia ki Sordar na ki Elaka bapher bapher kiba hap hapoh ka Sirdarship ban ia kren halor ka jingpynmih jingthoh ka sorkar da kaba pynhap ia baroh ki jaka kiba hap hapoh ka jaka jong ka sorkar phareng kum ki jaka sorkar. Ha katei ka jingialang ki la don kumba 150 ngut eiei ki sordar bad ki nong kitkam jong ki Elaka bapher bapher kiba la wan na ki 27 tylli ki Sirdar ship,la don ruh 15ngut ki MDC kiba la poi sha katei ka jingialang kaba la long ha Khasi National Dorbar Hall, Mawkhar.
Haba kren sha ki nongthohkhubor hadien ba la wai katei ka jingialang u Chief Executive Member ka KHADC u bah Pynshngaiñ N Syiem u la ong ba lakhot ia katei ka jingialang dei halor ka nongrim ba ka sorkar ka ieng kaba la pynmih ia ki jingthoh bapher bapher kum ka jingthoh jong u snem 1983 bad 1987, kaba la ong ba baroh ki jaka kiba hap hapoh ki jaka ka sorkar phareng ki dei ki jaka sorkar.
U bah Pynshngaiñ u la ong ba katei ka jingialang ka pyrshah ia katei ka jingpynshong nongrim ka sorkar ia kitei ki jingthoh. U la ong ba ka jingkhot ia kiwei pat ki Sirdirship nalor ka Saitsohpen ka dei namarba kiba bun ki Sirdirship ki hap mynshuwa ha ki jaka jong ka sorkar phareng bad lada ka sorkar ka klun jubor ia ki jaka ha Saitsohpen ka don ruh ka jingma ioh ba kiwei ki jaka kin ngat ka apot ka Saitsohpen hadien habud.
Katei ka jingialang ka la shim saw tylli ki rai, ka rai kaba nyngkong ka long ba ka sorkar ka dei ban weng bad pynduh pyndam noh ia baroh ki jingthoh kiba ong ba ki jaka ba hap hapoh ka sorkar phareng kin dei ki jaka sorkar. Kaba –ar ka long ba sorkar ka dei ban weng ia baroh ki Order kiba ka la pynmih ban shim jaka ha Saitsohpen khlem ka jingtip ki khun ki hajar katei ka Elaka bad ka dei ban wan ia kren thymmai bad ki bor Elaka kumjuh ruh ka District Council.
La rai ba baroh ki Sirdirship ki dei ban lum dorbar ha manla ki Elaka jong ki ban ia kren halor ka jingpynduh ka sorkar ia ka hoklong trai jong ki ia ka jaka puta. Ka rai kaba khadduh ba la shim ha katei ka jingialang ka long ba ka KHADC kan thoh sha u myntri rangbah ka jylla da kaba ai kopi sha ki myntri sorkar jylla ba ki dei ban pdiang ia kitei ki rai haneng kiba ka jingialang ka la shim.
Haba la kylli na u bah Pynshngaiñ hato katkum kitei ki rai ka mut ba ia kito ki jingtei kiba dang iaid shakhmat mynta ha Saitsohpen kiba la tei khlem da pan jingbit na ki bor shnong dei ban weng noh ia ki, “Ho, oid ka sorkar ka dei ban pynsangeh lut baroh, tad haduh ban da ia pynbeit thymmai, hap ban ia peitbniah , hap ban ia tai shuwa” ong u bah Pynshngaiñ N Syiem, CEM haba kdew ia ki jingtei kiba dang tei bad kiba dang iaid mynta ha ki jaka kiba la shu klun jubor khlem ka jingtip ki bor shnong. Shuh shuh u la ong ba ka KHADC kan ym pat phai khmat sha kiwei ki lynti hynrei kan ap ia ka jubab na ka sorkar hadien ba ka la dep ban phah jingthoh bad lada jia ba ka sorkar kam ai jubab u la ong ba kin sa shong pyrkhat da kumwei pat.
U CEM u la pyntip ba ka Saitsohpen ka don ka jingheh kaba 1750 akar hynrei lai pawa na katei ki dei ki jaka kiba la shah klun jubor ha ka sorkar kaba mut 1312 akar la sha hklun ,katba kaba sah ia ki paidbah ka long tang kumba 400 akar hynrei nalor nangtei ruh u la ong ba ka sorkar ka dang shu shim biang sa 106 akar kaba mut sa tang 300 akar kaba shong ki paidbah.
Phi don ban ong eiei?