Ka sorkar ka dei ban ai surok thymmai, lada kam lah ban pynurlong Ia ka surok T. 84 klur, ong ki paidbah

Nongpoh: Ha ka sien ba-ar, ki paidbah na ki katto katne tylli ki shnong khappud kiba don ha ka thain Umtyrnga ha Ri Bhoi, hynnin ka sngi Palei, ki la iamih paidbah biang, na ka bynta ban dawa pynioh surok bha na Chibra ter ter shaduh Umsen.

Katei ka jingdawa ka la wan, ka dei hadien ki paidbah na 12 tylli ki shnong kiba don ha katei ka thain, ki la khmieh lynti bha ba kin ioh surok bha na ka surok ba T. 84 klur, pynban ka nongrim kaba la pynlong ia ki paidbah ba kin mih paidbah, ka dei hadien ba ki la iohi ba ia katei ka surok la pyniaid na kawei pat ka jaka, kaba yn ioh jingmyntoi tang ar-tylli ki shnong.

Lyngba katei ka jingiaiaid paidbah da ki katto katne ki riew paidbah katei ka thain, la sngewthuh ba ka nongrim kaba la pynlong ia ki ba kin ia mih paidbah, ka dei namar ba ha kine ki khyndiat bnai ba la dep, ki briew nongthew surok, ki la dep ban thew ban woh ne Survey lyngba ka surok na Chibra ter ter sha Umsen, hynrei ynda la pyntrei pat, ki pynkynriah ia katei ka surok da kaba iaid lyngba ar-tylli ki shnong, kata lyngba ka shnong Bainanodi bad Pynker B.

Na ka jingiathuh ki paidbah jong katei ka thain, la ong ba ki shnong ki ban duh jingmyntoi na ka jingpynriah ia katei ka surok, ki kynthup ia ka shnong Chibra, Jorsyiem, Nagrabil, Jyrmang, Pillingku A bad B, ka Tamalbari A bad B, ka Pahamjila, Umlathu, Pynker C, Pynker A bad shaduh Umsen.

Haba iadei bad katei ka sngi, ki paidbah na kitei ki shnong, ki la ong ruh ba watla kim lah ban pyrshah ei ei halor ka jingpynkynriah ia katei ka surok, hynrei kin iai bteng ia ka sorkar jylla, b aka dei ban pynioh surok na Chibra sha Umsen, namar ha kitei ki bynta jong katei ka thain ki don shibun tylli ki shnong bad ba ki paidbah ki donkam shisha ban ioh surok.

Ki briew na kitei ki shnong, ki la ong ba ki la kwah surok eh, namar naduh ba la seng kitei ki shnong da ki phew phew snem bad kiba la ioh ia shibun ki nongmihkhmat, hynrei kat haduh mynta kim pat ioh surok, namarkata ki la dawa na ka sorkar jylla ba ka dei ban pynioh surok beit ia katei ka thain, khnang ba suk ka leit ka wan ki paidbah.