Bah Monarch Shabong
Ki la don bun kiba la nang wan phai sha la iing, na ka liang jong kito kiba sah sha ki jaka kiba jngai bad ngi dei ban sngewnguh ba haduh mynta, kim don satia kiba wan rah jingpang sha la iing, wat la ki wan na ki jaka kiba jur bha katei ka jingpang, kum kito kiba wan na Delhi, Maharashtra, Tamil Nadu bad na kiwei de ki jylla.
Wat la katta, ngi iohi, ba na ka bynta jong kitei kiba wan phai na shabar, ba ka jing pynshong kyrpang ia ki lane quarantine, kam hap satia ha ki kti jong ka sorkar, hynrei, ka la pyn kordit bad ka la pynbunkam shi katdei ia ki shnong bapher, ha kaba ki hap ban pyn donkam da ki iing skul, ki iing dorbar bad nangta ba ki hap ban pynkhreh sa ki nong pahara ha kitei ki iing bad nangta sa ka bam ka dih bad kiwei de ki jingdonkam kiba bun jait bun rukom.
Haba peit na ka jing tyrwa jong ka sorkar Jylla, la iohi, ba ka don ka jingthmu ban bei pisa, kaba long T.5,000 sha kawei kawei ka jaka pyn shong kyrpang ia kitei kiba wan phai lane kita ki quarantine centre bad lada ka long ha katei ka dur, ka pyni ba katei ka pisa, kam dei satia, na ka bynta ban ai bam aidih, ban sumar sukher ia kitei kiba wan sah kyrpang, hynrei, ka la shu long noh tang ka jing ai eh daw ia ki shnong, khlem da khein shuh ia ka bai sngi jong U Rangbah Shnong, ki nongkitkam Shnong, ki volunteer shnong bad sa ka jing shim jing kitkhlieh jong ki bor pyniaid shnong, na ka bynta ban ialeh pyrshah ia katei ka khlam.
Ngi la dep iakren kham mynshwa, ba kane ka sorkar, ka iakhun ia kane ka jingpang, ym da kaba pynlut pisa, hynrei la imat, kumba ka khmih lynti ban pynlut, da kaba shim na kiwei, kum ka khajna petrol, khajna kyiad, ot tulop na ki nongtrei sorkar bad sa kiwei kiwei de bad lada ka long ha katei ka dur, ka pyni shai pynban, ba ka jing sngew kitkhlieh, ka la long noh sha ki riew paidbah lane sha ki dorbar shnong bad kam dei shuh ha kti jong ka sorkar.
Ngin dang ia peit, ia kaei ka ban jia ha ki sngi, ki ban sa wan, namar ba kin dang wan shuh, sa shibun kiba don shabar Jylla; hynrei, lada jia ba ka jingbei pisa, ka long tang 5,000 sha kawei ka shnong lane ka centre, kumta katei ka pyni ba katei kam iahap satia ban pynbiang ia ki jingdonkam jong ki nongsah bad kan dei shisha, tang ka jing ai bai rneng pynban.
Phi don ban ong eiei?