Ka sorkar jong ki ehrang, da ki ehrang bad ia ki ehrang, ther ka US ia ka Taliban

Washington: Ki nong ialam ba ha khlieh jongka America, kiba dei na ka liang pyrshah Republican, ki la ther tyngeh ia ka sorkar Taliban, namar ba ka thung ia ki khlieh sorkar, da ki ehrang ba satar suda.

“Wat ju shah pynbieit. Kam don satia, kata ka sorkar kaba kham bha jong ki Taliban. Kane ka dei ka sorkar jong ki lehnoh, ba la thaw da ki lehnoh bad kaba dei ruh ia ki lehnoh” ong ka kynhun jong ki nongialam ka Seng Republican, kaba la ialam da U Jim Banks, uba dei u dkhot jong ka House of Representatives jong ka US.

“Kane ka sorkar ki Taliban, ka kynthup ia kito kiba la shah set phatok ha Guantanamo Bay, ki ehrang kiba satar bha bad sa kiwei de ki riew shimet, kiba don kti ha ki kam ehrang bapher bad kiba don jing iadei bad ka Al-Qaeda bad ka Haqqani Network,” ong sa U Tim Burchett, u dkhot jong ka Congress.