Ka sorkar India, kan nym pynduh satia ia ka article 371, ong U Shah

Guwahati: U Amit Shah, myntri kam poh iing ka sorkar India, mynta ka sngi, ula kren shai ba ka sorkar India, kan nym ktah satia ia ka article 371, kaba la pyndonkam kyrpang ia ka thain shatei lam mihngi.

Ka Article 370, ka dei kaba shu pyndonkam shipor, hynrei ka Article 371 ka dei kaba la thmu kyrpang, na bynta ka thain shatei lam mihngi bad ka don ruh ka jingiapher kaba khraw bah hapdeng kitei ar tylli ki artikel, ong U Shah, haba kren ha ka jingialang kaba 68 jong ka North East Council mynta ka sngi ha Guwahati.
Hadien ba la pynduh ia ka article 370 ha Jammu and Kashmir, ka don shibun ka jingiakren, ban pynduh noh ia ka article 371, ong U Shah “Nga la kren ha Parliament, ba kane kan nym jia bad nga ong biang mynta ka sngi, ha ka jingdon lang ki myntri rangbah ka thain shatei lam mihngi ba ka sorkar India, kan nym ktah ia ka article 371” ong U Shah.