Shillong:Ka Association for Democracy and Empowerment (ADE), ka pynrem jur halor ka jing leh thombor ki pulit ia ki nongiakhih sha ka thain shatei lam mihngi, hynnin ka sngi, ha kaba ki la don kiba iap bad kiba mynsaw ruh kumjuh bad ka ADE ka shim ba kane ka dei ka jingleh thombor, halor ka jingiakhih kaba katkum ki kyndon jong ka synshar paidbah.
Ka ADE, ka ong ba ka Citizenship Amendment Bill, ka dei ka ain jong ka sorkar India kaba pynjot thiaw bad ka ban ktah tyngeh ia ka thain shatei lam mihngi bad la ong shuh shuh ba ka sorkar India, ka pyni shai ba kam burom satia ia ka jinglong kyrpang jong ka thain shatei lam mihngi bad ba ka la shu thombor da katei ka ain ia ki briew jong kane ka thain. “Ki briew jong ka thain shatei lam mihngi, ki don ka jing shaniah ia U Narendra Modi bad ia ka seng BJP, hynrei katei ka seng, ka la shet kylla iangi” ong katei ka kyrwoh. Ka ADE, ka ong ba kane ka ain namarkata, ka dei kaba shah niam bad kaba pyni ba ka sorkar India, ka ka kwah ban nion da ka jubor ban pynsah ia ki khar Bangladesh sha kane ka thain. La ong shuh shuh, ba lada kum kitei ki jingjia, kan bha ban wad noh ia ka jinglaitluid na India, namar ba la khang lad ia ka hok bad ka jinglong kyrpang jong ki briew jong ka thain shatei lam mihngi, ong ka kyrwoh na U Dalseng Bira Ch. Momin, President, ADE, Apex Commitee, Tura.