Ka Sor Shillong na 6Mer sha Umiam

Shillong, 19 Lber:
Ka jingiar jong ka sor Shillong ka kynthup naduh 6Mer shaduh Umiam shaduh Mawlong, Mawdiangdiang bad haduh Laitkor. Katkum ka jingiathuh ka myntri kam sor ka Kong Ampareen Lyngdoh mynta ka sngi, hapoh ka iing dorbar, ka la ong ba ka Shillong Master Plan ka kynthup ia ki jaka ba hap ha Shillong Municipal, Shillong Cantonment, Madanrting, Mawlai, Nongthymmai, Pynthorumkhrah, bad 32 tylli ki shnong kyndong kiba don markhap bad ka sor.
 Kine ki shnong kiba don markhap bad ka sor kiba pynhap kum ki jaka sor ha ka Shillong Master Plan ki long Mawklot, Lawsohtun, 6th Mer, 5th Mer, 4th Mer, 3th Mer, Nongkseh, Umlyngka, Nongmensong, Nongrah, Rynjah, Umpling, Maw pat, Itshyrwat, Mawtawar, Mawkynroh, Mawlynrei, Mawshbuit, Nong um long, Laitkor, Nong pyiur, Nongkhlaw, Lyng kien-Mawpat, Mawdiangdiang, Madan Saisiej, Mawkasiang, Siejiong, Tynring, Mawpdang, Umphyrnai, Mawlyngad bad Mawlong.
Ka Kong Ampareen ka la iathuh ruh ba ki pud sawdong ka sor shaphang shatei ka long ka wah Umiam shaduh Bhoirymbong, Wah Tamdong. Sha Mihngi ka Sor Shillong kan iar shaduh Wah Umkhen shaduh surokbah NH44 hajan Sohryngkham, katba u pud shaphang shathie kan long shaduh Laitkor shaduh Nongpyiur. Shaphang sepngi, u pud ka sor un long shaduh wah Umiam.
Namar kane, baroh kine ki jaka la pynhap ha sor, bad kino kino kiba shna iing ki donkam ban ioh shwa ia ka jingbit na ka Meghalaya Urban Development Authority (MUDA) bad kim lah ban shna iing khlem da ioh jingbit na ka tnad MUDA.
Ka la ong ruh ba la pynbna paidbah ia kane man ka por lyngba ki lad pathai khubor.