“Ka Social media, ka dei ka nongshun ba hakhmat eh ha ka pule puthi”

Shillong:Ka samla ba wan nyngkong eh ha ka eksam HSSLC jong ka Commerce samla Filarisha Wann ka la ong ba ka jingtrei shitom bad ka jingtrei bha ki dei kiba donkam tam ban poi sha ka jingjop.

Kane ka samla pule ka St.Mary’s Higher Secondary School, Shillong ka la ïoh haduh 472 mark bad ïoh haduh 100 na ka 100 mark ha ka sobjek Mathematic bad Accountancy.
“Nga sngewkmen palat bad sngew nguh shikatdei eh ïa ki nonghikai jong nga bad ki kmie Kpa kiba la kyrshan ïa ka met bad mynsiem. Nga khlem khmih lynti ban wan hakhlieh duh hynrei kane ka la wan jia namar jong ki,” ong kane ka samla.
Kane ka samla ka la ai jingmut ruh halor ka jingdonkam ban long kiba la pynkhreh bha ha ka pyrkhat pyrdaiñ haba leit thoh ïa ka eksam.

Haba kren halor ki jingktah jong ki Social Media, kane ka samla ka la ong, “Ka Social Media ka dei kaba pynthut eh ïa ka jingpynleit jingmut ha ka pule puthi bad ki dei ki nongshun ba khraw eh jong ka pule puthi. Nga ruh nga la mad ïa kane hynrei phi hap ban kynmaw ba ka pule puthi jong phi, ka dei ban wan hakhmat eh”.
Haba kren halor ki lawei ban wan, kane ka Samla ka la pyntip ba kan sa leit pule ïa ka B.Com bad kan pynkhreh lang ruh ha kajuh ka por ïa ki competitive exam.

Ka Principal ka St Mary’s Sister Sonia Chacko ka la shim ïa ka kabu ban ai ka jingkhublei naduh ka mynsiem ïa ki samla pule, kiba la ïoh ïa ka jingjop da kaba ïoh top position ha ka eksam commerce.