Ka sobjek Arts, ka lynti ia ki khynnah baduk ka Thaiñ Sohra

Shillong, 21 Nailur:
Ka Sohra Government College ka dei ka kolej kaba rim bha kaba la seng ia ka naduh u snem 1982,hynrei kumba ka long mynta ka iing jong katei ka kolej ka long kaba jot rathai bad kam don ruh ki kamra kiba biang ban pynlong klas ia ki khynnah pule katkum kane ka juk mynta. Katkum ka jingioh lum jingtip la ong ba ha ka por slap ka jaw um ha ki kamra klas ruh.
Halor ka jinglong jingman bad ki jingduna ha katei ka kolej , ka KSU South Khasi Hills mynta ka sngi ka la leit ban ia kynduh ia ka myntri ba peit ia ka tnad Higher and Technical Education ka kong Roshan Warjri ha kaba ki nongialam katei ka seng ki la ai ruh da ka jingthoh kaba la soi da u President u bah M.Bynnud bad u Secretary ban R.Thiang.
Ki nongialam ka KSU ki la ia kren bad ai ruh da ka jingthoh sha ka kong Roshan ban pynpaw ba kumba ka long mynta katei ka kolej ka don kaba jot rathai bad ka buh jingma ruh ia ki samla pule kumjuh ruh ia ki nonghikai ioh ba ka twa noh ha kano kano ma ka por khamtam ha kine ki sngi ba ka jur ka jingkhynniuh jumai.
Ki la pyntip ruh ba katba nangmih ki sngi ki samla pule kiba pule ha katei ka kolej ki la nangbun bad kumba long mynta ki don haduh 920 ngut ki samla pule bad kitei ki kynthup ia 190 ngut ki klas XI, 155 ngut ki klas XII, 185 ngut ki BA 1st Semester, 200 ngut ki BA 3rd Semester, bad 190 ngut ki BA 3rd Year.
Katei ka seng ka la pynpaw ruh ka jingsngewkhia hakhmat ka myntri namarba ha katei ka kolej ka don tang ka Arts Stream bad katei ka buh jingeh ia ki khynnah kiba stad hynrei kiba wan pat na ka longing kaba duk ha kaba kim banse ban jied da ka Arts Stream wat lada ki kwah ban pule da ka Science lane ka Commerce tang namarba kim kotbor ban bteng ia ka jingpule jong ki sha sor Shillong ne shawei pat.
U President katei ka seng u bah M.Bynnud u la ong ba kim don lynti da kumwei pat lada ki kwah ban bteng ia ka jingpule jong ki –ka lynti ia ki ka dei beit ban pule ha ka Arts Stream.
Katei ka seng ka la kyntu ia ka myntri ba kan shinkhia ia katei ka kam ban pynbha noh ia ka ing jong ka Kolej bad ban wanrah noh ia ka Science bad Arts Stream ha Sohra College. U bah Bynnud u la ong ba ka myntri ka la kular ban shimkhia ia katei ka kam.