Shillong: Kiba haing hasem jong u bah Tyngshaiñ Mukhim uba la khlad noh na ka daw ka jingshah shoh ha uwei u Nepali ha madan Umwang ki la wan ban ia shim bynta lang ha ka jingshongkyraiñ ba ka KSU ka la pynlong myn hynnin ka sngi ha nongbah Shillong. Haba ia kren bad ki nongthohkhubor u kynum trai jogn u Tyngshaiñ u bah Bran Shadap u la iathuh ba ha ka por miet katba u dang wan jingiaseng bad haba u la poi hajan ing la don ba iathuh ia u ba u kynum jong u, la shah shoh ha u khar Nepali.
“Ngi la pynkit ia u ha ka por 1 baje mynmiet na shnong sha NEIGRHIMS, hadien ba la dep leh bun ki Test , ki X-Ray ki Scanning ki ong bym lah sumar shuh naba ka snier shapoh ka la jot na ka daw ka jingshah kyrdem, ngi la wan kit noh sha shnong bad ha ka sngi kaba bud u la khlad noh” ong u bah Bran Shadap uba don lang bad ka kong B.Mukhim ka meiduh jong u Tyngshaiñ kaba dei na ka shnong Sabuda.
Utei u kynum u la iathuh ba ha ka jingiakren bad u kynum jong u-u la iathuh ba ym don daw eiei bad utei u dkhar hynrei u la shah shoh beiñ, “Utei u dkhar ruh u wan pan map u on gym don daw eiei, bad u ong ba u la bakla shisha” ong biang utei u kynum. Na ka liang ka ing sem u la ong ba ki sngewsih kthang halor katei ka jingjia naba u kynum jong u -u la shah shoh beiñ shah lehbeiñ khlem kano kano ka daw bad khlem leh ia ki kam pap kam sang bad u la iathuh ba katei ka jingjia ka ju jia na ka por sha ka por ha katei ka shnong.
Lah ban kdew ba utei u rangbah Khasi na ka shnong Khlieh Umwang, u la shah shoh ha uwei u briew uba la tip kyrteng kum u Romesh Thapa na ka shnong Madan Umwang bad katei ka jingshah shoh ka dei ha Madan Umwang, utei u rangbah u la mynsaw bad la pynkit sha NEIGRHIMS, hynrei hadien u la khlad noh naba la jur palat ka jingmynsaw.