KA SNIEHDOH: KUMNO BAN IADA NA KA JINGLONG SAW BAD DAIT KA SNIEHDOH HA KAPOR TLANG

Kong Linda Kongwang

Ka jinglong saw bad dait ka sniehdoh ka ju jia borabor ha shuwa ba ka tlang kan poi bad iakane lah ban sakhi lang da baroh. Kine kilah ban wan jia ne mih na kiba bun ki daw kum ka jingsdang tyrkhong jongka sniehdoh, ka jingpynshah palat iaka met haka sngi, kajingshah haka lyer khamtam ha kapor khriat ka pynlong iaka sniehdoh ban tyrkhong bad dait. Kidon ruh kiwei ki daw kum ka jingdih dawai palat bad ka jingtlot ka rukom tylliat jingbam kidei kiba lah ban pynmih khniang haka met.Manla uwei pa uwei u briew u mad iakane ka jingeh haka jingim bad ka jingthrang kalong tang kumno ban wadlad naka bynta ki jingsumar ban lait naka jingtrud khah khah iaka sniehdoh.

KA DAW JONGKA JINGLONG SAW BAD DAIT KA SNIEHDOH HAKA POR TLANG.

1. KA JINGKYLLA KA SUINBNENG:— Katkum ka jingiathuh jong kawei naki nongwadbniah jongka Dermatology Department ka kdew shai ba ka jingtyrkhong ka suinbneng haka por tlang ka kjit noh iaki moisture haki bynta ba shabar ka sniehdoh kaba pynlong iaka sniehdoh ban tyrkhong bad ialam shaka jingdait bad saw. Ka jingjur lyer haka por tlang kadei kaba pyntyrkhong bha iaka sniehdoh bad ka met baroh kawei, hynrei ka lyer kaba mih naka jingsyaid ding hakapor khriat ka nangpynsniew shuh shuh iaka sniehdoh jongphi.
2. KA JINGSHAH PALAT HAKA UM:— Ngi tip ba ka um kalong kaba donkam bad kaba kongsan naka bynta ka met ka phad bad naka bynta ka jingim bad ki jingdonkam baroh. Ka por lyiur kadei kaba ngi ju sngewtynnad bha ban sum ban sait bad ban shah haka um, hynrei kane kalong mar khongpong haka por tlang. Ka jingsum bad shah palat haka um haka por tlang ka pynlong iaka sniehdoh ban nang tyrkhong bad dait bad kane ka ialam shaka jingpait pdang khamtam lada sum da ka umkhluit.
3. KA JINGPYNDONKAM PALAT IAKI KYNJA DAWAI KHEMIKALS:— Kane ka iaid ryngkat ryngkat bad ka jingshah palat ha ka um. Ynda ki briew kila dep ban pynshah ialade haka um, ki ju mlien ban tah ne sleh iaki kynja jingsleh kiba don khemikals haka met. Borabor ki ju pyndonkam iaki jingsait kti (hand washer), bad ka jingsleh shibun ki sabon haka met, kane haka jingshisha ka pynlong iaka sniehdoh ban nang tyrkhong bad dait namar kine ki jingsleh ki sait lut iaki umphniang ne ki khlein kiba don lypa haka met kaba wanrah jingeh iaka sniehdoh.
4. KA JINGBYMIAHAP KA RUKOM SUMAR IAKA SNIEHDOH:— Katkum ka jingkdew jong kawei naki doktor ba shemphang shaphang ka sniehdoh, ka iathuh ba kidon bunjait ki rukom sumar naka bynta ka sniehdoh kaba tyrkhong. Hynrei dakaba pyndonkam iaki khlem da bthah daki doktor, kane ha ka jingshisha ka nang pynsniew shuh shuh iaka sniehdoh shaba palat. Ka jingbymiadei ka rukom sumar na ka rukom tah iaki jingsleh ruh kalah ban nang wanrah arshah iaki jinglong saw bad dait ka sniehdoh jongphi.
5. KA JINGDON LYPA KIWEI PAT KI JINGSHITOM:— Teng teng ka jingtyrkhong bad dait ka sniehdoh kadei ka dak paw jong kiwei pat ki jingshitom haka met jongphi. Kito ki briew kiba don iaka diabetes, ka jingduna ka Vitamin haka met, ka jingshahktah haka psoriasis lane kito kiba la koit naka jinging haka ding ki kham iakynduh jingeh halor ka jingkoit jingkhiah jongka sniehdoh. Kine ymtang baki pynsaw ne dait haka sniehdoh hynrei kidei kiba lah ban saphriang sha baroh ki bynta jongka met lada ymlah ban sumar haka por kaba biang.

6.KA RTA:—- Ka sniehdoh jongphi kalah ban nang tyrkhong bad stang katba ka rta ka nangheh. Kiro kiba la heh rta ne kiba la rangbah ka rta ki kham iakynduh jingeh halor ka jingtyrkhong ka sniehdoh naka daw jongki hormones. Teng teng ka jingtyrkhong bad dait ka sniehdoh haki kynthei ka kham ktah shibun ban iaki shynrang. Kane kadei naka daw jongka jingshahktah ki hormones kiba thmu ban pawdak haka rukom ka menopause kumka hypothyroidism lane ka hyperthyroidism.

KINE HARUM KILONG KI KATTO KATNE KI LYNTI KIBA LAH BAN PYLLAIT NAKA JINGLONG SAW BAD DAIT KA SNIEHDOH.

1. KIAR NA KIEI KIEI KIBA PYNLONG IAKA SNIEHDOH BAN SAW BAD DAIT:— Pyrshang ban sngewthuh ne ban ithuh kaei kaba pynlong iaki dak ki shin haka met bad ialeh ban kiar naki. Kine kilah ban dei naka jingbenkam palat ki jainphong, ka jingshit ki kamra shaba palat,ka jingsum palat daka umkhluit man ka sngi lane ka jingktah ia kiei kiei kiba jakhlia bad pum pum. Kiar nakine kiba buh jingeh iaka sniehdoh bad ban ioh iaka met bad ka snieh kaba shait ba khlain.
2. PYNDONKAM IAKI JINGSLEH KIBA IADEI BAD KA SNIEHDOH:—- Naka jingtyrkhong ka suinbneng haka por tlang ka nang pyntyrkhong iaka sniehdoh jongphi. Pyndonkam daki jingsleh kiba don iaka hypoallergenic bad ki fragrance-free moisturizer kiba kynthup iaka cetaphil, Eucerin, Cerave bad kiwei kiwei kiba phi lah ban pyndonkam la kumno kumno shisien shisngi. Kine ka iarap pyllait naka jingtyrkhong bad pyllait naka jingdait ka sniehdoh jongphi.
3. KIAR KATBA LAH NAKA JINGTRUD IAKA MET:— Ka jingsaw bad dait ka sniehdoh ka pynlong iaki shympriah kti jongphi ban bud beit shata tang ban ioh trud,hynrei phim tip kine ki jingtrud jongphi kilah ban nangpynsaphriang sha kiwei pat ki bynta jongka met kaba ialam shaka jingioh bunjait ki jingpang haka sniehdoh. Namar kata pyrshang ban kiar katba lah naka jingtrud iaka met, hynrei lada phim lah ban tehlakam iaki shynpriah kti philah ban pyndonkam daki tiar ne da ki kynja dieng ba rit ban trud iaka met ha ka jaka jongki shympriah kti.

4.PYNDONKAM DA U ALOE VERA:— U Aloe Vera idei u jait jingthung uba la ju pyndonkam naduh ki por mynshuwa ban sumar ia bunjait ki jingpang jingshitom. U lah ban iarap bad ai jingmyntoi naka bynta ka sniehdoh. Une u jingthung udei uba lah ban pyndonkam kum u anti-inflammatory, anri- microbial and antioxidants. Ki gel kiba don hapoh ki sla jong u Aloe Vera kidei kiba lah ban ai jingiarap ban pynduna iaka jinglong saw bad dait ka sniehdoh bad uba lah ban pynkoit iaki jingmong haka sniehdoh.

5.PYNDONKAM DA U BAKING SODA NAKA BYNTA KA SNIEHDOH:— U baking soda u don iaka anti fungal properties uba lah ban pynjah iaka jinglong dait ka sniehdoh hangto hangto hi. Kaei kaba phi dei ban leh kalong phi lah ban khleh khyndiat u baking soda bad ka umsyaid haka um ba phi sum, phi lah ruh ban khlehlang ia u baking soda bad khyndiat ka umsyaid nangta sa tah ha ki jaka ba long dait bad py duna iaka jingdait ka sniehdoh.

6.PYNDUNA IAKA JINGBANBOR HAKA JINGMUT JINGPYRKHAT:— Ka jingbanbor jongka jingmut jingpyrkhat kalah ban nang ktah bad pynsniew shuh shuh iaka sniehdoh jongphi. Pyrshang ban pynleit jingmut haki kam kiba bha kiba ai jingmyntoi iaphi daka kilan met, ialehkai bad ki paralok, leh kino kino ki kam kiba pyllait iaphi naka jingbankhia ka jingmut jingpyrkhat. Haba ka jingmut jingpyrkhat ka biang, philah ban pynleit jingmut haki kam kiba bha bad kiba donkam kiba lah ban pynklet iaka jing dait ka met ym ban pynleit jingmut tang ban trud. Ka jingpyrkhat iakiei kiei kiba bha ymtang ba ka ai jingmyntoi iaka sniehdoh hynrei ka ai jingmyntoi ruh ka jingkoit jingkhiah jongka met bad ka mynsiem.