Ka sngi thohdieng ba khuid kaba pher

Bah RM Shabong

Ka 10tarik Iaiong 2020, kan sah khana pateng pakit ha ka histori jong ki balang Khristan ha ka pyrthei baroh kawei bad kata ka long ba ka jingrakhe ia ka sngi Good Friday lane ka Sngi Thohdieng ba khuid, ka dei kaba hap rakhe, ha la ki jong ki jong ki iing bad ba la khang da ka pakhang shnong jong ka sorkar India, namar ka jingtieng ia ka jing ia pur u khniang jingpang coronavirus.

Kane ka jingkhang, kam dei kaba la khang tang ha India, hynrei kiba bun ki ri ka pyrthei ruh ki don ha ka jingkhang shnong bad kitei ki kynthup ia ka Bangladesh, kaba don ha syndah jongngi bad nangta sa kiwei pat ki ri ba khraw bor, kum ka United States, United Kingdom, France, Germany bad kiwei. Hynrei ha kat kane ka jing khang shnong, ka long pynban ka jing kyrkhu kaba khraw ia ki riewngeit Khristan kiba don ha Shillong, lane ia kito kiba ioh internet bad kata ka long ba ha ka jaka ba kin leit sha kawei ka jing iaseng bad ban sngap ia kawei ka jing iathuh khana halor ka mat jong ka Good Friday, hynrei lyngba ka youtube bad lyngba ki cable tv, ki la lah ban iohsngew ia ki jingrwai kiba biang bad kiba shngiam, na ki balang bapher jong ka sor Shillong bad nangta sa ki nongkren kiba khraw bad kiba pawnam, ba kin iathuh shaphang ki jing shisha jong ka jing shah iap U Jisu Khrist.

Kane ka jing sam ia ka khubor jong ka Good Friday, kan iai bteng ruh ha ka Easter Sunday bad lada ka long ha kane ka rukom pynbeit, ka pyni ba ki nongialam jong ki balang Khristan, ki la shemphang shibun, ha kaba ki la iasam ia ka ktien U Blei, lyngba ka juk thymmai bad lada ka long ha kane ka dur, khlem pep, kin lah ban iai bteng nangne shakhmat, wat ha ka por suk pyrthei ruh, ba ki para ba ngeit, kin ioh sngew ia ki kyntien ba shong blei na ki Phadar, ki Bishop, ki Pastor bad ki Tymmen Basan, kiba don ha kylleng ka Ri Khasi Jaintia.

Kane ka dei ka juk digital, kaba ka sorkar India, ka ju hikai bha sha u paidlang ka Ri Khasi Jaintia bad kaba kongsan, ka long ba ka internet, ka dei ban biang, ha man la ki shnong bad lada katei ka la biang, kumta ka siew ka tda, ka jing pule khubor bad ia baroh ki jingtip kiba donkam hapdeng ka sorkar bad ki paidbah, hapdeng ki balang bad kumta ter ter, yn lah ban pyniaid da ka jingstad thymmai tam jong kane ka juk.