| Purningstar Shabong Kum ban phai dien liak, u briew um lah ban im khlem da kyrshan bor da ka Mariang ha ka sawdong sawkun jong u. Bad kumta hi ruh ki longshwa jong ngi ki sumar kyndong ïa ka mariang da kaba pynneh pynsah ïa ki jingthung jingtep, ki mrad ki mreng bad kumta ter ter naba ïa ki jingthung u ïoh ïa ka jingbam bad na ki mrad u ïoh ïa ka doh, ka snieh bad ka sboh. Bad dei lyngba ka jing pynneh jong u, u sa lah ban ïoh ïa ki soh ki pai, ki jhur ki jhep, bad ki dawai naka bynta ka pang ka shitom. U sngewthuh biang biang ba lada kawei na ki bynta ha ka Mariang ki duh noh, kan buh ha ka jingeh kaba khraw ïa ka jingim jong u hi. Bad dei halor kita ki daw, u ïeng ban buh ki Khlaw Kyntang ban neh la ki dieng ki siej, ki phlang ki kynbat ban dang suhsieng ka lyer bad ban ïai kyrsoi miar miar ki umpohliew na ka bynta ka jing myntoi jong u hi. Hynrei kat dang roi u bynriew, ka Mariang ka sdang ban jot naba u bynriew ula kynrang lut ïa ki lum ki them, ki dieng ki siej ki sdang ban khyllem lut, ki phlang ki kynbat ki sdang ban duh noh, ki umpohliew ki sdang ban jah noh bad ki wahduid ki sdang ban lati bad lali noh. Ym tang katta, hynrei ula biah pongrai lut ïa ka sawdong sawkun da ki lali bad ki iwtung bad kane ka jing leh jong u ka dang pynsniew dur shuh shuh ïa ka jingiwbih jong ka lyer bad ka jing sngur jong ki um ki wah. Hooid ka long shisha kaba eh haduh katta katta na ka bynta ban khang lad ïa ki tei ki daw ba la kdew haneng, hynrei to mynta ngin peit kaei kata ka lad ka lynti kaba ngi dei ban shim ban pynneh pynsah ïa ka Mariang sawdong sawkun. Bad hangne ngan ym kren lut ïa kita ki lad, hynrei ngan kren tang ïa kawei ka mat kaba kham kongsan na ka bynta ban pynneh pynsah ïa ka Mariang. Haba ngi peit sawdong ki bynta jong ki Ri ba pher ba pher jong ka pyrthei, ngi shem ba kham bun ki briew ki dei kiba shong ba sah ha ki thaiñ Nongkyndong ban ïa kito kiba shong ha ki thaiñ sor bad kumba 90 tam ei ei na ka 100 ngut ki nongshong shnong ki dei ki briew kiba shaniah tylli beit ha ki dieng na ka bynta ban shet jingshet, ban syaid ding bad kiwei kiwei ki bynta. Ka jing pyndonkam ïa ka dieng ka long ha ka dur jong ka dieng ïap thang bad ha ka dur jong u rnga. Ka jing pynjulor ïa ki dieng da kaba thang ka kham jur bun bun shah ban ïa ka jing pyjulor na ka bynta ban thaw jingthaw kata ka mut, haba pom dieng na ka bynta ban shna jing shna hap ban jied tang ïa ki dieng kiba la ïaw bad kiba la san, hynrei haba pom na ka bynta ban thang dieng ïap bad thang rnga pat la shu pom na phang lin naduh kiba dang rit dang lung haduh kiba la san. Sha ki thaiñ Nongkyndong ngi sakhi kyndiang ïa kata, ba la syllen lut ki lum ki them tang na ka daw ba pom dieng thang bad ban thang rnga. Ki briew manla u snem khamtam ha ki por tlang, ki hap ban pom na phang tang ban ïoh dieng ïap thang baroh shi snem bad kumta shi kumta hi manla u snem ka ïai bteng haduh ba ki dieng kim ïoh lad shuh ban heh ban san bad ban roi. Ka long shisha kaba i danda haduh katta katta ban ïai ïohi bad ïai ïohsngew ba na ka liang jong ka sorkar ka ïai pyrta shaphang ka jing pynneh Mariang hynrei kane ka jing pyrta jong ka sorkar ka shu long kumba shu pyrta lamwir ha ka pyrthei jong ka jingdum naba kam lah ban ïohi ki khmat bad kam tip kumno ban leh. Balei mo ka long kumta! Lada na ka liang jong ka Sorkar ka shim ki lad ki lynti ban weng noh ïa baroh ki tei ki jingeh khnang ban pynneh pynsah ïa ka Mariang bad ban khang lad ïa ka jing pom dieng thang bad ban pynthikna ba yn ym don shuh wat tang kawei ruh ka longing ka ban shet jingshet da ka dieng ne da u rnga. Khlem artatien, ki lum bad ki them kin ïai sei lung da ki dieng bad kin dap biang smam da ki dieng ba jyrngam bad hangta ka mariang sawdong sawkun kan paw biang ïa ka dur ba jyrngam. Ban weng ïa kane ka bynta, ka sorkar kala dei ban trei borbah ban pynmih (generate) bording shibun da ki buit ba bun kiba la lap haduh mynta bad ki ban dang ïai lap ha ki sngi ki por ki ban sa wan. Ka la dei ban pynkiew ïa ka kam ban pynmih bording na ka lyer, ka sngi bad ka um namar kine ki lai tylli kin ym ktah ïa ka mariang ne ïa ka dieng ki siej. Ka um ka shu tuid beit sha ki duriaw bah khlem da ïoh ban pyndonkam hok, ka jingshit jong ka sngi ka la dang khlaiñ bad kaba sngewsih ka long ba khlem lah ban pyndonkam hok ïa ka, ka lyer kaba kaweh jan baroh 24 kynta ruh khlem nang ban pyndonkam hok ïa ka. Lada ïa ki tei ki lai tylli ba ka kdew haneng la pyndonkam hok, ka bording kan pahuh bad haba ka bording ka pahuh, la lah ban sam sa baroh ki briew la sha ki thaiñ sor ne thaiñ kyndong na ka bynta ka jing donkam ha ki kam baroh. Bad hangne ki briew kin ym donkam shuh ïa ka dieng (rnga) na ka bynta ban shet jingshet bad bad ban syaid ding. Bad hangta khlem artatien ki dieng kin sdang ban khie lung, ban roi bad bad tap lut ia ki jaka ba mih dieng. Haba nga ong kumta, kam mut pat ba ngan ong ba ynnai thung dieng shuh, hynrei kane kadei tang ka jing ai jingmut sha phi baroh na ka bynta ka pateng ka ban sa wan namar ka long ka lad kaba kham suk bad ka bym don jingktah ïa ka Mariang bad ruh ka dei ka kamram jong ngi iwei pa iwei ban buh ka jing kit khlieh ban pynneh pynsah ia ki dieng ki siej. Bad haba thung dieng la dei ban thung tang da ki diengmet, namar kat kum ka jing shem jong nga lada ngi thung da ki dieng kseh, ka khyndew ka long tyrkhong bad ka long ra bad ngam juh kham shem koit ban don ki jaka ki ban mih um ne ka khyndew kan tngen bad kan sboh. Hynrei ki dieng met pat ki ai jing tngen ïa ka khyndew, ka khyndew ka sboh, ki them ki mih um bad kham bunsien ha ka jaka ba don tang ki diengmet, ka um kam juh jah baroh shi tlang bad baroh shi lyiur. Hooid, ka la don ka jing pyrshang ban pyndonkam noh da ka bording ha kaba shet jingshet bad kiwei kiwei. Hynrei kane kala buh ha ka jingeh kaba khraw ïa baroh bad kala khang lad ïa ka tei ka jingthmu ba bha namar ba ka sorkar lyngba ka tnad ba dei peit ïa ka kam bording ka la dawa pisa bai bording ha ka dor kaba heh bha. Kane ka jing pynheh(rem dor) palat ka bai bording ka la wanrah ka jingeh kaba khraw ha ki thaiñ nongkyndong namar ba ka kham rem ka bai bording ban ïa ka bai bam. Na katta ka daw, ki briew ki kyntait noh na ka jing pyndonkam bording. Halor kata, lada ka sorkar ka kren shaphang ka jing pynneh pynsah ïa ki dieng ki siej, ka la dei ban sam ei ïa ka bording sha baroh ki paidbah ne la dei ban shim bai bording ha ka dor kaba duna eh. Lada lah ban leh kumta, wat kito ki longing kiba duk tasam ruh ki lah ban pyndonkam beit ïa ka bording la ha kino kino ki kam kiba manla ka sngi. Kine ba la kdew haneng ki dei tang na ka bynta ka bording kaba pynmih na ka um.Ym tang katta, haba ong bording bad ban sam ei ïa ka bording, kam thew eh ia ka bording kaba pynmih na ka um, hynrei ka thew ïa ki tei baroh lai tylli ki bym ktah ïa ka maraing (eco-frienfly). Bad haba phai pat sha ka bording kaba pynmih na ka sngi bad ka lyer, ka sorkar kala dei ban wad ki lad ki lynti ban sam ei ïa ki tiar sha baroh Ki longing jong ki paid nong shnong shnong na ka bynta ban pynmih bording. Hooid na ka liang ka sorkar ka la pyrshang ban leh ïa kane ban sam bording sha ki paidbah, hynrei ka dor ka dang rem bad ka jing sam ka dang duna palat. La donkam ba ka sorkar ban pynkiew shuh shuh ia kane ka jing sam bording sha baroh ki paidbah ha ka dor kaba rit eh ne kaba ym donkam ban da siew pisa. Bad lada ka sorkar ka lah ban leh ïa kane ka kam bah ka la don jingmut keiñ ban pyrta pynneh Mariang. Kumta ka por ka la ih ba ka sorkar, ka dei ban da wad bniah bha bad ban phai khmat sha ki daw tynrai jong ka jing pynjot ïa ka Mariang bad la dei ban wad ki lad ki lynti kumno ban pynmih bording na ka bynta ban sam sha ki paidbah ha ka dor kaba rit eh ne ha ka jing bym donkam siew ei ei ia baroh khnang ba kin lah ban weng noh mardor ïa kita ki dak kiba ktah ïa ka Mariang. Ka la dei ban sangeh noh mardor na ka jing pyrta lamwir hynrei la dei ban pynsngewthuh ïa ka badei bad na ka bynta kaba bha. Hynrei, ban leh ïa kata ka kam bah kam shong eh tang ha ka sorkar namarba kham bun kita kiba shong ha ki shuki jong ka sorkar ki long kiba la bthi ka jabieng haba la heh palat ka tulop bad la sop kheiñ lut ka bor pyrkhat. Na katta ka daw ka por ka la dei ruh ïa ngi iwei pa iwei ban rah ïa kane ka jingmut/khubor bad ban dawa ïa kane ka kabu khnang ba ka pateng jong ngi kan ym kynduh ïa ki jingeh bad khnang ba ka Mariang kan jyrngam biang. Haba ka Mariang ka jyrngam, ka lyer kan khuid bad ka um kan pahuh, ki dawai kynbat kin jyllei, ka khyndew kan tngen bad kan sboh. Ha kaba khatduh, ka jing myntoi kan long ïa ngi baroh lang iwei pa iwei. |
Phi don ban ong eiei?