Ka sngi kut snem, ba khlem naia saw ia ki kotkhubor

Shillong, 31 Lber:
Ka sngi kut snem 2015, ka dei ka sngi jong ka jingiam pait dohnud ia ki trai kot khubor, kiba ju shaniah ia ka jingsiew pisa na ki tnat sorkar.
Kat haduh mynta ka sngi, haduh ka por ba thoh ia kane ka khubor, ki trai kotkhubor bad kiba lum ia ki bai jingpynbna, ki shu shang sharum shaneng, la kum ki bieit ban wad ia la ki ram ki shah na ki tnat sorkar bapher.
Hynrei ka jubab, kaba sngewsih, ka long ba man kat ki tnat sorkar, ki jubab ba kim don pisa satia, wat tang shi damli, ban pynjaw ia ki bai jingpynbna jong ki kotkhubor.
Kat ka ophis jong ka tnat pathai khubor ka sorkar Jylla, kaba dei ka ka tnat, ka ban peit ia ka bha ka miat jong ki kotkhubor, hynrei, kam shym la pyllait satia ia ki ram ki shah jong ki kot khubor, wat tang shi pisa saw ruh.
Ki trai kotkhubor, ki la shu ia kylla mat lieh bad kim pei phang shuh ia kane ka jingpyn hiar kput bad leh bym khein snep ia kitei ki ram ki shah jong ki kotkhubor.
Ki kotkhubor, ki don ki ram, kiba la poi da ki phew snem, hynrei, kiba khlem siew satia bad haba khein lang ia baroh ki ram ki shah jong ki kotkhubor, tang kiba pynmih na Shillong, la antad, ba ka la kot sha ka T.5klur eiei bad ki bym shym la don ba salia ban siew satia.
Ka jingkyrduh pisa jong ka sorkar, la iathuh da kito kiba don ha ki tnat sorkar, ka long ba ha kane ka snem ba ladep, la shu pynkylla khongpong lut ia ka pisa, kaba wan na kawei ka pla, la thep sha kawei pat ka pla bad kumta haba ka sorkar India, ka pan jingkhein bad haba ka jingkhein kam iahap, hangta ka set sbak artad ia ka pla pisa jongka bad hangne, ki sa kordit ki kontraktor, ki paidbah bad kiwei kiba trei kam bapher ha ki tnat sorkar.