“Ka sngi ba iong” shilak ngut “khlem kam” mynta ka sngi ha Jaintia Hills 17tarik, pakhang shnong ki trai dewiong, 12 kynta ha ka Jylla

Jowai, 14 Jymmang:
Mynta ka dei ka sngi kaba don da u dak iong, uba heh tam, ha ka histori jong ka Jaintia Hills bad ka daw, ka long namar ba shi lak ngut tam, ki nongbylla, ki nongniah trok, ki nong kit bad pynhap dew iong, ki shongsngi.
U Ma Balen Thubru, uba dei U President jong ka Jaintia Hills Truck Owners Association (JHTOA), haba iakren bad U Rupang, u iathuh ba mynta ka sngi, ym don shuh, uba thep mar, ym don shuh, uba tih dewiong, ym don shuh ki nongbylla, kiba don ha ki rud surok, kiba jied mawsleit bad sa kiwei kiwei de ki kam.
Kaba U Ma Balen, u khmih lynti, ka long ha ka 19tarik mynta u bnai, ha kaba kan don ka jingiasaid hapdeng ka sorkar Jylla bad ka National Green Tribunal, na ka bynta ba kan weng ia katei ka kyndon.
“Lada ka sorkar Jylla, kam lah ban weng ia katei ka kyndon, kumta ka Bank, kan buh haei ia kitei ki trok, namar kiba bun ki shim, da ka ram” ong U Ma Thubru.
La ai jingkhein shuh, U Ma Thubru, ba tang ki trok, kiba shong sngi mynta ka sngi, ki la poi sha ka 3,500tylli antad bad haba khein lang ia baroh ki par dewiong, kin poi sha ka 5hajar tylli ki trok bad ha ka jingdon jong u nongniah bad u nongbud, kumba 4ngut na kawei ka trok, kumta kiba shongsngi mynta ka sngi, kin don kumba 20hajar ngut antad.
Sa ki nongbylla, kiba don sha ki par dewiong, ha ka jingkhein antad, utei u nongialam jong ki seng trok, kin don kumba 20hajar lane 30hajar ngut, nangta sa ki nongbylla kiba don ha ki rud surok, kiba jied mawsleit bad kiwei pat, ha kaba kin don kumba 30hajar ngut eiei bad ha ka jingkhein antad, jong utei u nongialam jong ka seng trok, kin kot sha shi lak ngut, ki nongtrei dewiong kiba don sha Jaintia Hills, ki ban shong sngi mynta ka sngi.
La iathuh da U Ma Balen, ba haduh mynta, kam pat don kano kano ka hukum,ba la ai da ka sorkar sha ki trai par, hynrei, la shu leit da ki pulit bad kiwei pat ki briew, na ka bynta ban khang ban thep dewiong, ban tih dewiong sha ki jaka tih bad ki jaka thep mar sha Jaintia Hills.
U Ma Balen, u iathuh ruh, ba ha ka 16tarik mynta u bnai, kan

don ka jingialang paidbah jong ka JHTOA, ha hynniew mer, ha ka por 12baje nohsngi, ban iakren ia kane ka kam bad la bthah ia baroh ki trai par bad ki trai trok, ba kin ia poi lang sha katei ka jingialang kaba donkam eh.