Ka Smriti Zubin Irani, ka dei kaba sngewrit bad kaba iajan bad ki paidbah:Conrad

Nongpoh: Ha ka sngi kaba ka Smriti Zubin Irani, Myntri ka tnat Textiles jong ka sorkar India ka la wan ban bun ia u Mawnongrim na ka bynta ban tei ia ka Integrated Textiles Tourism Complex, u la ai ka jingiaroh kaba khraw ia katei ka Myntri da kaba ong ba ka dei ka Myntri kaba sngewrit tam na baroh bad kaba kwah ruh ban don ka jingiadei kaba jan bha bad u paidbah.

U la ong ruh, ba ha ka jingiaid lynti jong u, u la shem ia bunjait ki nongmihkhmat paidbah, ha kaba ki don ha la ka jong ka jong ka jinglong, hynrei haba khein kyllumlang, kim da don ia kata ka jingsngewrit bad kwah ia ka jingiajan ia ki paidbah, kumba long ka Smriti Zubin Irani.

Watla ngam kwah ban kren ia kiwei la ki don ha ka jinglong kaba bha ne sniew, namar baroh u ne ka briew ki don ha la ka jong ka jinglong bad ki iapher uwei na uwei pat, ha kaba ha ka jinglap jong u, u shem ba ka Smriti Zubin Irani ka don ia ka jinglong kaba kyrpang halor ka jingsngewrit jong ka bad khamtam eh haba iadei bad ka jingieid jong ka ia ki paidbah.
Haba iadei bad katei ka jingbuh Mawnongrim ban tei ia ka Integrated Textiles Tourism Complex ha Nongpoh, u Conrad K. Sangma, u la pynpaw ia ka jingkmen kaba khraw, namar kan dei kawei na ki lad ban kyntiew bad ban pynshlur ia ki paidbah kiba sngewtynnad ban trei ha ki kam lajong bad ha kajuh ruh ka por ba kan long kum kawei na ki lad ban nangkyntiew ia ki kam jngohkai pyrthei hapoh ka jylla Meghalaya.