Shillong: Ka BJYM Meghalaya ka sngew khia jur halor ka jingsdang pur ki kam dih drok bad kam khaii drok hapoh ka skul bah ka North Eastern Hills University (NEHU), Shillong bad kiweri de ki jaka ha nongbah Shillong.
Ha ka jingpyllait khubor, u president ka BJYM Meghalaya u Bah Egenstar Kurkalang u la ong ba ha ka jingshisha, ka NEHU ka dei ka skulbah ban ai jingnang jingstad ia ki samla na ka bynta ka lawei ba bha jong ki, phewse sngewsih ban iohi ba don pynban kiba shim kabu ban kamai spah jubor da ki kam sniew ban pynngop ia ki samla pule ha ka kam dih drok bad pynlong ia kane ka skulbah kum ka jaka ia khaii.
“Ka BJYM, Meghalaya ka kyrpad ia ki bor pyniaid ban pyrkhing bad bishar bniah bha haba pynrung skul ia ki samla ha kane ka skulbah bad kumjuh ruh ia kiba sah hostel, namar ngi kwah ba kane ka skulbah kan dei ka shlem saindur ban wanrah iaka nam ka burom iaka jylla jong ngi bad kumjuh ban kyntiew iaka imlang sahlang ym ban long pynban ka ktem ki kam sniew kum ka kam ia khaii drok”, la ong u Bah Egenstar.
U la ong ba ka BJYM, Meghalaya ka ai khublei iaka NEHUSU kaba la trei shitom ban bat ban ai jingsneng ia ki ar ngut kiba donkti haka kam khaii drok hynnin ka sngi bad dei ban nang buddien bad peitngor shuh shuh halor kane khnang ban pynduh jait syndon ia kum kine ki jait kam ha kane ka skulbah.
Ka la ong ba lada lap iano iano kiba donkti dei ban phah beit shaki bor ka ain khlem jingmap namar kidei kiba la pynjah burom iaka NEHU bad iaka jylla.
Ka seng ka kyrpad ia ki Dorbar Shnong, ki seng samla, ki sengbhalang, ki seng longkmie, ki sengniam kumjuh iaki paidbah ban ia treilang bad ki bor pulit ne ki bor ka ain khnang ban rat diengkhong ia kum kine ki jait kam.