Ka skhim FOCUS bad ki surok Nongstoin Town Road kam dei ka ram, ong U MR

Nongstoin:U Myntri Rangbah jong ka sorkar Jylla, u Conrad K Sangma, u la pynshai paitbah mynhynnin ka sngi ha ka jingialang ban sam ia ki cheque sha ki Producer Group kiba hap hapoh Nongstoin constituency ba ka jingioh pisa lyngba ka FOCUS kam dei ka ram hynrei kane ka dei ka jingai jingiarap jong ka sorkar ia kaba ki paidbah nongrep kim donkam shuh ban siew bad u la khmih lynti ba kine ki dkhot jong kine ki group kin pyndonkam hok ia katei ka jingiarap.

Ha kajuh ka por u Myntri Rangbah, u la pynshai ruh ba ka pisa kaba la bei da ka World Bank na ka bynta ban shna iaki surok hapoh ka sor Nongstoin kaba kynthup haduh 11 tylli ki shnong kam dei satia ka ram hynrei kadei ka pisa lyngba ka Corporate Social Responsibility (CSR) kaba dei ka pisa kaba kano kano ka bank ne ka company kaba wan buh branch hapoh ka jylla ne ka ri India kadei ban ai jingiarap lyngba ka sorkar, kumta ki paitbah kimdei ban shah ialam bakla ha u bieit u them uba kwah ban batai stad khlem da tip eiei ruh em shaphang ki rukom treikam jong ka sorkar.

Ha katei ka sngi, na ka liang u Myntri Rangbah ryngkat u Bah Hamletson Dohling bad Bah Macmillan Byrsat ki la ioh ban sam ruh ia ki cheque sha ki nongrep tit kiba hap hapoh ka Meghalaya Mushroom Mission bad kumjuh sha ki Producer Group lyngba ka skhim FOCUS.
U Myntri Rangbah haba kren ha katei ka sngi ban sam jingiarap sha ki nongrep lyngba ka skhim FOCUS u la iathuh ba ngi sngewthuh ba ki nongrep ki dei kiba kongsan tam bad ki nongrep ki dei ka bynta ba khraw ban kyntiew iaka ioh ka kot bad ki ba bun ki nongshong ha ka Jylla ki dei ki nongrep, hynrei ki nongrep baroh shikatta kim shym la ioh iaka jingkyrshan na ki sorkar bala dep, namarkata kane ka sorkar MDA ka don ia ka thong ban kyntiew ia ki nongrep da kaba wanrah ruh ia shibun ki prokram ha kaba iadei bad ka rep ka riang kum ka rep syieng, rep shynrai, ka Milk Mission, ka Piggery mission ha kaba palat shihajar klur ka sorkar ka la pynlut ban kyrshan ia ki nongrep ha kine ki saw snem shiteng bala dep” ong u Conrad sangma u ba la pynpaw ruh ba kane ka dei ka thong jong ka sorkar ban kyrshan ia ki nongrep ha ka jylla.

U la iathuh ruh ba nalor ka Focus prokram, kaba la dep ban iaid shisnem shiteng mynta ka sorkar ka la pyntreikam biang lyngba ka FOCUS Plus, kata nalor ba la dep ban pyllait pisa 5 hajar sha ka group yn ai pat sa 5 hajar sha ki personal account jong kito ki dkhot jong ka group na ka bynta ban kyrshan biang ia ki nongrep lyngba kane ka prokram.
U la ong ba ha kine ki shi snem shiteng, ki la lumlang palat 2 lak 50 hajar ngut ki nongrep lyngba ka Focus prokram bad palat 18 hajar ki group, la dep ban thaw ha kaba ka sorkar ka la dep ban mang tyngka ruh haduh palat spah klur na kabynta ban ai jingiarap direk sha kine ki group.

Haba kren ha katei ka sngi na ka liang jong u MLA ka Nongstoin, u Bah Macmillan Byrsat u la ai ka jingiaroh ia u Myntri Rangbah u ba la pyrkhat kyrpang iaka thain Nongstoin kumjuh iaka West Khasi Hills District namar ki paitbah ka thain Nongstoin khambun ki im na ka rep ka riang bad ka jingplie lad jong ka sorkar ban ai jingiarap iaki nongrep lyngba ka FOCUS bad ka FOCUS plus ka la nang kyrshan shuh shuh iaki nongrep jong ka thain Nongstoin.
U la kyntu ruh ia ki nongrep ba kim dei ban shah ialam bakla ha kum kine ki por, namar ki don bun kiba bishni iaka jinglah jong kane ka sorkar mynta da kaba ialam bakla noh bad ban pyntieng hynrei ki paitbah kidei ban kynmaw ba ka sorkar kam leh ia kano kano ka kam ban pynkhuslai jingmut lane buh iaki nongrep haka jingeh paitbah hynrei ka sorkar ka ialeh ban wanrah ki lad ki lynti kumno ba kin nang kiew ha ka rep ka riang.