Shillong: Ka shnong Sumer ha Ri-Bhoi District kaba la shah ktah ha ka jingpang sohkhrud sniehdoh ki masi ne ka lympy skin disease (LSD) ka la lait na kane ka jingpang mynta. Baroh ki masi kiba la kem pang, kila koit lut mynta bad ki la biang nadong sha ding.
Haba pyntip ia kane mynta ka sngi, u rangbah shnong bah Arkini Sumer ba la don lang ki nongri masi khem dud, u la iathuh ba mynshwa kila khlad san tylli hynrei lyngba ka jingshim khia ki doctor, ki nongri masi bad kumjuh na ka shnong ban phikir, baroh ki masi kiba la kem pang, kila koit lut mynta bad kam don jingma shuh ban dih ia ka dud.
“Mynshwa ki don 5 tylli ki masi kiba khlad bad mynshwa ki briew ki kham salia ban dih dud ha shnong hynrei mynta hadien bym don shuh kiba pang, kam don shuh ka jingsngew salia ban dih ia ka dud”, la ong u bah Arkini.
U bah Arkini u la iathuh ba ki doktor na Umsning, kiba la peitngor ia kine ki masi, kila pynthikna ba kam don shuh ka jingpang. “Ki doktor ki la phun ia nga, ki la ong ba kim don shuh ki jingpang bad kiba pang la dep ai tika bad ki la jem”, la ong u Rangbah Shnong.
Kumjuh uwei u nongri masi, u la iathuh ba baroh ki masi kiba kem pang kila jem lut ha kine ki ar taiew kiba la dep.
Kila kyntu ia ki briew ba kim dei shuh ban sngew khohnioh ban dih dud, namar ba kam don shuh ka jingpang kum mynshwa.
Ha Sumer ki don kumba 15 tnum ïing kiba ri masi khem dud bad kine kila bsa dud ia ki paidbah ka shnong bad ia kiba shabar ruh kumjuh.
Phi don ban ong eiei?