Ka shnong Rtiang ha Ri Bhoi, ka nuksa babha ia kiwei pat ki shnong ban iakhun ia ka khlam COVID-19

Nongpoh: Ka shnong Rtiang ha Ri Bhoi, kaba harud ka surok na Umsning sha Mawrong, ka la pyni ia ka nuksa kaba bha eh sha kiwei pat ki shnong ha ka Distrik bad jylla hi baroh kawei, kata ka long ba ki paidbah ha katei ka shnong, ki la ianohsynniang ban iarap ia kito ki briew kiba la ioh COVID-19 ha katei ka shnong.

Lah ruh ban kdew hangne, ba ka shnong Rtiang ka dei ka shnong kaba la don ki briew kiba la ioh nyngkong eh ia ka khlam COVID-19 ha Mawrong Road Area, bad ha katei ka shnong la don ruh ki briew kiba la khlad na ka Khlam COVID-19, nalorkata ki la don shibun ngut kiwei pat kiba la ioh ia katei ka jingpang COVID-19.

Pynban haba phai sha kawei pat ka liang, lyngba ka jingnang ban pyniaid ki nongialam shnong bad kumjuh ruh da ka jingiatreilang ki paidbah ha katei ka shnong, kiba la kloi ban iarap ia kito ki longiing kiba la shah ktah na ka jingpang COVID-19, ka la pynlong ia katei ka shnong ba kan lah ha ka ban tehlakam na ka jingsaphriang ka khlam hapoh katei ka shnong, kata ka long ba ki lah ban tehlakam ia kito kiba la ioh COVID-19 bad nalorkata ki da iarap ruh ia ki.

Haba kren sha ki lad pathaikhubor, u Bah Banlumlang Lyngdon, uwei na ki dkhot hapoh ka CCMC ha katei ka shnong, u la ong ba ha ka por ba ki nongialam shnong ba CCMC ki la leit ban kynduh ia kito ki longiing, kiba la shah ktah ha ka khlam COVID-19, da kaba kyntu ia ki ba ki dei ban shong khop ha iing khlem da mih sha bar, hynrei ha kaba kum katei ka por, la mih ka jingkylli na kitei ki longiing sha ki nongialam shnong, ba kim lah ban shong khop ha iing, namar ki donkam ban ioh ia ka bam ka dih bad ban leit bylla leit sngi.

U la ong ruh, haba ki nongialam shnong bad CCMC, ki la iohsngew ia kata ka sur na kitei ki longiing, ki la pynlong ia ka jingialang, da ka jingthmu ban kyntu ia ki paidbah hapoh ka shnong ba ki dei ban iarap ia kitei ki longiing. Katei ka jingthmu ki nongialam shnong bad CCMC kam shym la long sepei, namar ki paidbah na katei ka shnong, ki la iarap ban nohsynniang la ka long da ka pisa bad kumjuh ruh da u khaw bad ki jhur ki jhep, khnang ba kin ioh ban iarap ia kito ki briew kiba shah set slung ialade.

Haba iadei bad katei ka mynsiem sbun da ki paidbah ka shnong Rtiang, u Bah Charles Marngar, MDC Mawhati bad uba la dei uwei na kiba la iarap eh ia ki briew ha katei ka shnong, u la ai ka jingiaroh kaba khraw eh ia ki paidbah jong katei ka shnong, namar ka jinglong kylluid mynsiem ka jong ki, ha ka ban iarap ia kito ki longiing kiba la shah ktah ha ka khlam COVID-19 bad uba la ong ruh ba ka nuksa kaba la pyni da ki paidbah ka shnong Rtiang, ka da long kawei na ki Nuska kaba bha tam sha kiwei pat ki shnong bad ba ki paidbah na kiwei ki shnong ki dei ban bud.