Ka shnong kaba hajan Nongpoh, ka dang shu ioh Iing durbar

Nongpoh:Ki paidbah ka shnong Umskun, ha Ri Bhoi, ka shnong kaba jngai tang kumba 4 km eiei na Sor Nongpoh bad 1 Km duna na Surokbah NH-6, ki la kmen eh, hadien ba ki la ioh ia ka iing Durbar, ia kaba la plie paidbah mynta ka sngi da u Bah Mayrald Born Syiem, MLA Nongpoh, da kaba pynmang pisa lyngba ka skim SRWP jong u snem 2019.

Katei ka shnong, kaba don kumba 54 tnum iing ei ei, ka la dei kawei na ki shnong kaba la rim bha, hynrei haba phai pat sha ki kam pynroi, ym iohi dak ei ei ruh em, wat la ka dei ka shnong kaba don hajan ka Sor Nongpoh bad kumjuh ruh na ka surokbah NH-6 ha Ri Bhoi.

Haba iadei bad katei ka sngi, kaba ki paidbah hapoh katei ka shnong ki la ioh ia katei ka Iing Durbar, ki la pynpaw ba ki kmen eh, namar kim pat ju ioh ia kiba kum kitei ki kam pynroi ha shnong ha thaw bad kiba ai jingmyntoi sha ki paidbah ka shnong, ha kaba ki la ong ruh ba ka dei ka sien kaba nyngkong ba ki Nongmihkhmat kin leit ban plie paidbah ia ki kam pynroi ha shnong.

Ki da ong ruh, ba ha kine ki 40 snem kiba la leit noh baroh, u Nongmihkhmat ka Nongpoh, um ju leit mih sha katei ka shnong, watla ka dei ka shnong kaba dang donkam ia shibun ki kam pynroi, khamtam eh haba iadei bad ka surok kaba pyniasoh na NH-6 sha katei shnong, kaba don ia ka jingjngai tang kumba 1 km ei ei.

La don kawei ka Longkmie kaba la ong, ba la thait ban leit ud leit nam sha ki nongialam kiba la leit noh, namar ka shu kut tang ha ki jingkular haba leit ban kynduh bad nalorkata, ki shu wan ban kular kai tang ha ki por ba jan ka ilekshon.

Haba iadei bad ka jingeh kaba la kynduh da ki paidbah hapoh katei ka shnong, u Bah Mayrald Born Syiem, u la ong ba u sngewthuh eh bad u kubur ruh ba katei ka shnong, ka la shah iehbein ha ki nongialam ba la leit noh.

Halor ka jingdonkam ki paidbah ban ioh surok, u MLA Nongpoh, u la ong ba katei ka shnong ka donkam eh ban ioh surok, namar ka dei ka shnong kaba don tang ki nongrep bat rei shitom bad kaba dei ruh ka shnong kaba jur bha haba iadei bad ka jingpynmih ia ki mar rep mar riang. Kumta ngan trei shitom na ka bynta ban pynioh surok bha hapoh katei ka shnong.
Kiba la donlang ha kaba plie ia katei ka Iing Durbah shnong Umskun, ki kynthup naduh u Bah Mayrald Born, MLA Nongpoh, u Bah Plielad Tiewsoh, President ka NBCC, u Bah Staphan Kshiar, Rangbah shnong Umskum lem bad kiwei ki rangbah shnong jong katei ka thain.