Ka shnong jong U Mukul ha Nongrim Hills, ka kyntait ia ka ain shongwai

Shillong, 17 Risaw:
Ka long ka bym lah satia ban sngewthuh, ba U Mukul Sangma, myntri rangbah ka Jylla, u kwah ban pyntreikam ia ka ain shongwai ha kylleng ka Jylla Meghalaya, haba tang ha ka shnong lajong, ba u shong u sah ha Nongrim Hills, um shym la lah ban pynsngewthuh ne ban pynmynjur ia ki bor shnong ia ka jingmut jongu.
Man ka por, haba iakren bad ki nongthoh khubor, um ju klet ban pynkynmaw, ia ka jaka shong jaka sah jong u ha Nongrim Hills, hynrei, ha kane ka kynti, imat, ula klet ban iakren bad ia syllok bad ki bor shnong halor katei ka ain shong wai, kaba u thmu ban pyn treikam ha ka Jylla.
U Rangbah Shnong ka Nongrim hills, U bah James Lyngwa, haba iakren bad U Rupang da ka telephone mynta ka miet, ula iathuh ba u myntri rangbah, um pat ju khot satia, wat tang shisien, ban iakren bad ki bor Shnong, halor katei ka ain ka ain. Halor katei ka jingkylli jong U Rupang, la ula ju khot ne em ban iakren ia ain shongwai, lane ia ka mat ILP, U bah James, ula ong “Kam don eiei kaba kum kata”. Hynrei, ula ong shuh shuh, ba ki bor pyniaid jong ka Shnong, kin sa leit ban iakynduh ia u, ban iakren halor ka jingthut ka suk ka sain bad kumjuh ia katei ka ain shongwai, namar ba la iathuh da U bah Lyngwa “ba ula kynriah sha ka iing sah jong ka sorkar”.
U bah James, hi ula kren shai, ba katei ka ain shongwai jong ka sorkar, kan pynduh noh ia ka bor jong ki Rangbah Shnong, bad ki dustur ki riti, kiba la ju don baroh shi katta, ha kaba u ong “Mynta baroh ka bor kan shong ha U DC”.