Ka shithi sha ka PCF, “imat tam sneng ka HSPDP ia u Bah Hoping”?

Shillong,29 Naiwieng:
Ka shithi ka Hills State People ‘s Democratic Party, HSPDP kaba ka la phah sha ka People Candidate Forum ha ka 4 tarik u Risaw 2013, la paw tyngkrein ba ka CEC ka HSPDP ka ka la rai ban kyrshan tylli tylla ia u Pastor PBM Basaiawmoit kum u kyrtong monlang ha kane ka elekshon MP Lok Sabha ban wan.
Katei ka shithi ba la phah sha ka PCF ka dei kaba la soi kyrteng da u General Secretary ka HSPDP u Bah E.K Raswai. Ha katei ka shithi la thoh ‘Katkum ka shithi ba la ioh pdiang na ka PCF , ka Central executive committee jong ka HSPDP kaba la long ha ka 4 tarik u risaw ka la ia kut da kawei ka jingmut ban ym pynieng kyrtong na ka seng na ka bynta ka MP Elekshon 2014 bad ka la rai ban kyrshan ia u Dr.PBM Basaiawmoit kum u kyrtong monlang ka PCF’ la soi ia ka shithi da u GS ka seng, haba jubab halor ka jingpan jingkyrshan ka PCF na ka seng katba ka shithi ba ka KHNAM ka la phah ia ka jubab sha ka PCF pat kam shym la paw ba ka kyrshan ia u Pastor Basaiawmoit hynrei ia u kyrtong monlang ba ka PCF ka jied. Kum ban shu kdew bah duh mynta ka PCF kam pat pynbna ia u kyrtong monlang hynrei ka la don ka jingtyrwa ia u Pastor Basaiawmoit ban long kum u kyrtong monlang.
Shuh shuh ha kaba ia dei bad katei ka phang , haba phai sha ki 3 –saw sngi ba la dep la iohi ba u President ka HSPDP u Bah Hopingstone Lyngdoh u la ieng skhem beit ba ka party kam pat shim kano kano ka rai ban kyrshan iano iano ha kane ka elekshon MP Lok Sabha ka ban wan ha kaba u Bah hoping u la iathuh ruh ba u la ia kynduh ia u Pastor Basaiawmoit bad u la kylli la un ia khun ne em na ka party, hynrei u Bah hoping u la ong ba u la kyrngah bad kyntait da kaba ong ba um don bynta shuh bad ka HSPDP. Lah ruh ban pynkynmaw ba u Bah hoping u la ong ba kam don kano kano ka jingpynshisha ban kyrshan ia uno uno u briew u bym shym la ia soh bad ka Party.
Haba ia nujor ia ka jubab jong u Bah hoping bad ka shithi kyrshan ka HSPDP ia u Pastor Basaiawmoit la iohi ba ka long mar pyrshah, ha kaba u President Rangbah u la kyntait katba ka CEC ka la mynjur ban kyrshan bad kane ka paw shai ba ka HSPDP ka la tam sneng ia u President jong ka da kaba shim rai hi kaba ma u, um tip.