Ka Shillong Labet, kum ka lahduh ha ki kynthei bad shynrang ha ka 2nd Berchem cup ha Nongpoh

Nongpoh: Ha kaba kut ka 2nd Berchem Cup Open to All Basketball Tournament, ka lympung ialehkai kaba la pynlong da ka Seng Samla Nongpoh ha madan Sajer, ka Shillong Labet, ka la ioh ban rah ia ka nam lahduh, la ka long ha liang ki kynthei bad shynrang ruh kumjuh.

Haba phai ha ka jingiakhun ki kynthei, ka Shillong Labet ka la iakhun pyrshah ia ka Tyllilang Basketball Academy, hynrei ha ka jingiakhun, ka Shillong Labet ka la ban pynliem noh iaka Tyllilang Basketball Academy da 54 la 40 basket. Katba haba ki shynrang Shillong Labet ka la iakhun pyrshah ia ka ONYX Major bad ha ka jingiakhun, ka Shillong Labet ka la lah ban pynliem noh pyrshah ia ka ONYX Major da 62 la 57 basket, kaba la pynlong ia ka Shillong Labet ba kan long kum ka lahduh, la ka long ha ki shynrang bad kynthei ruh kumjuh.

Haba phai sha ki khusnam, ka kynhun ki shynrang jong ka Shillong Labet ka la ioh rah ia ka song pisa kaba T. 50, katba ka kynhun ki kynthei kiba la long kum ki lahduh, ki la ioh ia ka song pisa kaba T. 25 hajar.

Ka ONYX Major ha ki shynrang, kaba la shah rem noh ha ka phainal, ka la ioh ban rah ia ka song pisa kaba T. 20 hajar, katba ka Tyllilang Basketball Academy, kaba la shah rem noh ha ki kynthei ka la ioh ban rah ia ka song pisa kaba T. 10 hajar.

Haba phai sha kiwei pat ki khusnam kiba don ha katei ka lympung, ia ka nam best discipline team na ka kynhun kynthei la rah da ka Splash bad ha ki shynrang la rah da ka Dulon Basketball Academy. Ia ka nam Youngest Player la rah da u Raymond Khongsit na ka kynhun DBA bad ka Phibalari Kharmaw na ka kynhun Tyllilang, ia ka khusnam MVP la ioh rah da u Henminlam na ka kynhun ONYX Major bad ka Iairi Sangma na ka kynhun Shillong Labet, ia ka khusnam Top scorer pat la ioh rah da u Lal Rem Ruata na ka kynhun Ri Bhoi Khlawait bad I Yarisha Wahlang na ka kynhun Tyllilang.

Kiba la donlang ha katei ka sngi, kaba la pynkut noh ia katei ka lympung ialehkai Basketball, ki kynthup ia u bah Jayson S. Mawlong MLA ka Umsning Constituency, u Paiem Wanphrang Syiem Nongshai, u samla Ferdynald K. Kharkamni, President KSU NKHD, u bah Rayonald Kharkamni lem bad shibun kiwei pat.