Ka Shillong ka ktem khaii kynja

Shillong, 07 Nailar:
Ka nongbah Shil-long ka la long kum ka ktem jong ki kam khaii kynja ba shyrkhei bha ha kaba ha kane ka sngi Saitjain ka tnad Custom ka la ioh ban kurup haduh T. 90 lak u kynja na ki bynta ka nongbah.
Dang shen, ki la ioh ruh ban kurup ia u kynja na Khyndai Lad uba shong dor haduh T. 2 klur eiei.
Ha kane ka sngi Saitjain, ki pulit Custom kila ioh biang ban kurup ia u kynja ba 850 kg na kawei ka trok ba shong dor T. 42.50 lak bad kane ka long ha surok Shillong Bypass ha ka sngi Thohdieng.
U Deputy commissioner (Preventive) u Bah IR Kharkongor u la ong ba kine ki kynja la buhrieh ha jaka shong u nongniah ka trok. Ia u nongniah kane ka trok la kem katkum ka ain NDPS Act.
U la ong ba katkum ka jingtohkit, une u kynja u dei jong uwei u briew ba dei trai ia ka kali u Kishan Malhorta uba phet krad ban lait ka shah kem.
U nongniah ka trok u la iathuh ha ki Custom ba une u kynja la wanrah na jylla Tripura bad la thmu ban pyniaid iew sha Guwahati.
Ha kawei ka jingjia, ki Custom ki la kurup shiteng kilo u drok ba shong dor T. 50 lak na uwei u briew na Khyndai Lad ha kane ka sngi Saitjain. Ia une u briew ba dei na Chandel district ka Manipur la kem bad u dei uba sah ha Nongthymai, Shillong la 17 snem.