Ka Shi Kyntien ka Mobile App, ba shna ki 3 ngut; ban kyntiew ia ka ktien Khasi

Shillong: Ka Mobile App kaba kyrteng ka ‘Tang Shi kyntien’ ka la mih katto katne taiew hynrei ka la paw bha. Ia kane ka Mobile App la shna da ki lai ngut ki samla Khasi ba kynthup ia u samla Aibor Nongkynrih, Aikindasuk Khongsngi bad u samla Denzil Sawian.

Kane ka Mobile App la shna na ka bynta ka jingthmu ban kyntiew ia ka ktien Khasi, ha kaba ki briew ki lah ban ialehkai da kaba wad ia ki jait ktien bad ki dur ba iahap.

Kum ka dak ka jingpynshlur bad ai mynsiem ia ki, ka KSU mynta ka sngi ka la pynkup burom ia ki hadien ba la pyllong ia ka jingbuh syntiew ha u mot u Paiem Tirot Sing Syiemha madan Iewrynghep.

Haba batai ia kane ka App, u samla Aibor Nongkynrih, u la ong ba ki samla ha kine ki sngi ki duna ban sngewthuh ban pyndonkam ka ktien Khasi ha kaba la klet ia ki dak bad dei halor kane ba ki la mih ka jingmut ban ban thaw noh da ka App ban ialam iaki samla ban sngewthuh ban tip ia ka ktien Khasi.

U la iathuh ba haduh mynta tang hapoh ar taiew shiteng, la don kumba 10 hajar ngut kiba la sei ne thep ia kane ka App ha ki Mobile. “Ka donkam ka jingkyrshan ki paidbah ban lah ban leh ia kiwei ki jingialehkai”.

U la ong ba ha ka jingiatreikam jongki, ka kham jynjar ban pynwad ia ki ktien bad ki dur haduh ba ka shim por kumba shi snem eiei . “Ngi kwah ban shna ia ki App ban nang ruh ka ktien phareng ban iarap ruh ia ka ktien Khasi. Ngi kwah ban shna ia ki app kum ki jingspel dak, ka jingialehkai bad kiwei”, u la ong.

Shwa ia kane, haba pynbna ia kine ki samla, u general secretary ka KSU u samla Donald V Thabah u la ong ba ka kane ka jingialehkai ka Mobile App kaba kyrteng ka Tang Shi Kyntien ka long ban pynkyndit biang ban pynrung ia ka ktien Khasi ha ki khun samla.

“Kine ki samla kila shna ruh ia ka Bible ha ka ktien Khasi lyngba ka Mobile App, ka Cood Books of Seven Sisters, ka App ba hikai jingbam Khasi bad kiwei jong ki briew kane ka thain”, u la ong.