KA SHA: Ki jait sha kiba bha ban dih ha kane ka aiom slap

Kong Linda Kongwang

Ka por lyiur ka la wan bad bun nangi ngi sngewtynnad ban lehkmen haba hap slap khamtam kito kiba sah ha ki thain rilum. Ha kane ka por, ka suinbneng ka long itynnad bad khuid bha bad baroh kaba ka mynsiem jongngi ka thrang kadei shi pela ka sha kaba khluit bad ki jingbam malu mala. Kane kadei shisha ka aiom kaba biang tam na baroh ki saw aiom ban dih sha.
Baroh ki ri ka pyrthei ki don la kijong kijong ki jingleh kmen ne ki rukom bam kiba iapher na kawei ka ri sha kawei pat hynrei tang kawei kaba iasyriem kata dei ka sha. Ka jingbang ban dihsha kadei namar ka rukom shet kalong kaba bang haduh katta katta bad phi sngew ba kadei shisha ka por kaba biang ban dihsha haka por slap. Bad ruh kynmaw ban dihsha haka por slap ka iarap ban iada na shibun ki khniang jingpang. Hynrei kiba kumno ki jait sha phi donkam ban dih haka por slap kiba lah ban iarap pynsyaid iaka met bad ialeh pyrshah iaki khniang jingpang. Hangne phin iohi katto katne ki jingai jingmut shaphang ki jait sha kiba phi dei ban dih haka por slap:

1.Ka sha bad u sying(ginger tea):— Ka sha ba shetlang bad u sying kidei kiba halor tam naki jait sha kiba ju pyndonkam ha satlak ka pyrthei ha ka por slap. Ki iarap ban ialeh pyrshah iaka jingsuhkhriat haka met, ki iarap bha haba set ryndang bad iarap haba mih khniang ruh. U sying u iarap bha haba suh kpoh kaba ju jia borabor haka por slap bad ka sha ba shetlang bad u sying kilah ban pynjem kloi ia kine ki jingshitom da kaba kyntiew iaka jingtuid bha ka snam shabaroh ki bynta jongka met.
KUMNO BAN PDEM:-– Kane kadei ka rukom shet kaba suk tam, shet pynthnam ia ka um haduh bakan da khluit bha bad ber khyndiat ka slasha,nangta sa ot rit katto katne ki symboh sying bad ber haka sha kaba khluit bad sa dih kloi khlem da ieh ba kan pjah.

2. Ka sha jyrngam (green tea):— Baroh baŕoh ngi tip bha shaphang kine ki jait sha. Ki son bun kiei kiei kiba ka sha jyrngam ki leh ban ai iangi iaka jingkoit jingkhiah ba pura. Da ka jingdon kyrhai ki antioxidants haki, kine ki jait sha ki iarap ban pynkhlain iaki bynta ba shapoh jongka met. Haka por slap ban pynkhlain iaki bynta ba shapoh jongka met, ki iarap bha ban pyllait naka jingshah hiar thma haki khniang jingpang ba har rukom. Kine ki jait sha ki iarap ruh ban sait bad pynmih iaki khleiñ kiba sniew naka met bad iarap pynsting iaka met ka phad. Kine ki jait sha kim dei kiba bang ne kim don jingmad ban dih hynrei phi lah ban ber malu mala ka shini ne ka ngap ban dih.
   KUMNO BAN PDEM:— Ka sha jyrngam ka dei kaba suk tam ban pynkhreh. Shet pynthnam iaka um nangta ber khyndiat ki slasha haka um khluit, ieh kumba katto katne por haka um khluit ba kin ih bha nangta sa theh haka pela ban dih. Phi lah ban khleh lang ia u sla tulsi bad ka shini ban ioh iaka jingmad kaba biang. Hynrei kan kham bha lada phi dih khlem da khlehlang bad ki jingber ba thiang.
3. Ka sha ba jew(Lemon Tea):— Ka por slap borabor ka wanrah shibun ki jingpang khamtam ha kaba iadei bad ka jingdap lyer ka kpoh. Ban dih da kine ki jait sha ka khate noh iaki jingeh haki nierlang kum ka jingsuh kpoh, pyn at kpoh, dap lyer ka kpoh, kynroi prie bad suh traikpoh. Namar kata ka sha bajew kadei kaba biangtam naka bynta kito kiba don ia kine ki jingshitom ha ka met.KUMNO BAN PDEM:— Ot pynrit iaki sla sohjew ne u sohjew khyndiat ha ka pela bad sa khlehlang bad ka umkhluit haki, ieh kumba katto katne por bad sa khlehlang katto katne ki sla sohjew ba im ha kajuh ka pela ban dih. Phi lah ban khlehlang ka ngap ne ka shini ba kin thiang. Kine ki jait sla ki kyntiew iaka bor kynmaw jong ka jabieng ha u briew.

4.Ki sha symbai (Chamomile Tea):— Ia kine ki jait sha la ju pyndonkam bha haki ri Sepngi ne ki ri phareng ban sumar ia shibun ki jait jingpang kiba ktah iaka met. La ju tip ba kidon haki ka bor kaba lah ban ialeh pyrshah iaki jingtyrha shadem bad ban ialeh pyrshah iaki khniang kiba mih haka met kiba iarap bha hakane ka por slap. Namar ka por slap kadei ka aiom kaba wanrah shibun ki jingpang kum ka jingpang baiong khlieh, suh khriat, ka jingshit met ki jingpang iabit bad mih khniang haka met bad sniehdoh. Kine baroh kilah ban jia lada phim nang ban sumar bha ialade. Hynrei da kaba dih iakine ki jait sha, kan pyllait iaphi na kine ki jingpang. Kiwei pat ki jingmyntoi phi ioh haba dih iaka sha chamomile ki kynthup iaka jingjah thait ka met bad ki treikam na ka bynta ban iohthiah bha. Kine ki jait sha ki ai jingmyntoi shibun khamtam ia kito kiba ban khia bad khuslai ka jingmut jingpyrkhat bad lada phi dei iwei nakita, phi lah ban pyrshang dih da kine ki sha chamomile.
KUMNO BAN PDEM:— Ber khyndiat ki symbai chamomile kiba tyrkhong haka pela, nangta shet pynthnam iaka um bad sa theh haka pela. Tap bha iaka pela bad ieh kumba 5 — 7 minit, nangta sa dih iaki dakaba khlehlang khyndiat ka shini ne ka ngap kat ban biang.

5.Ka sha kynbat (Rosehip Tea):— ka jingsat ryndang bad jyrhoh bad kiwei de ki jingpang kiba iabit,ki ju jia bha ha ka por slap. Namar kata dih daka sha kynbat bala shna naki sla Rosehip kiba la ju pyndonkam naduh ki por hyndai kiba ju shem ha kylleng ka pyrthei, kiba ju iarap bha ban pynkhlain iaki bynta ba shapoh jong ka met bad kiba biang tam ban sumar haba u ryndang u sat ne set. Kine ki jait sha ki kynthup ruh haki iaka VitaminA, B3, C,D bad E kiba lah ban iada iaka sniehdoh ban mih khniang bad ki pynkhuid iaki jakhlia kiba lang hapoh ka met bad kyntiew iaka jingkhlain jong ki bynta ba shapoh jong ka met ha kane ka por slap.

KUMNO BAN PDEM:— Shet pynthnam shi klat ne shi maloi ka um bad khlehlang iaki sla Rosehip kiba la tyrkhong haki. Kynmaw ban da tap bha iaki la kumno kumno 10 — 15 minit. Hadien kata phi lah ban dih khlem da khlehlang bad ka shini namar u Rosehip u don lypa ki jingthiang bad jingiwbih ha u.