|
Shillong: U President ka seng Bharatiya Janata Party (BJP) u bah Shibun Lyngdoh u la ong ba ka dei ka jingtrei shitom jong ki dkhot ba dki nongkitkam ba ka BJP ka la nangkiew irat hangne hapoh ka jylla.
Ha ka jingïakynduh bad ki nongpathai khubor mynta ka nohphaisngi hapoh ophis treikam jong ka seng, u bah Shibun u la ong, “Ka dei ka jingtrei shitom jong ki nongtrei ka seng kiba la trei borbah met bad mynsiem miet la bad sngi ha Rilum Khasi Jaiñtia bad Garo kiba la noh synñiang shikatdei sha ka thong jong ka BJP.”
Ha kajuh ka por u bah Shibun u la ai khublei ruh ïa ka Election Commission of India (ECI) da kaba ong, “Ngi ngeit bad shaniah ha ka jingpynïaid jong ka ECI kaba la pyntreikam mynta lah jan 20 snem bad kaba ki paidbah ki ngeit bad shaniah.”
“Ngi la ïoh jan 75000 vote mynta ka kynti, kumta ngi ai khublei ïa ki paid nongthep vote kiba la pynpaw ka jingshaniah ha ka seng BJP bad kaba la noh synñiang shikatdei sha ka thong jong ka lawei jong ka ri,” la bynrap u bah Shibun Lyngdoh.
U bah Shibun u la bynrap da kaba ong, “Shi tyllup ngi ïohi ba ki paidbah ki shaniah ha ka seng BJP bad ngi pynpaw ka jingsngewnguh ïa ka seng kumjuh ïa u Myntri Rangbah Narendra Modi uba la jop biang sa shisien pat, bad ngi kyrmen ba nangne shakhmat ki paidbah ka jylla ruh kin ïohi ïa kane bad kin ai ka kti kamon ka kti kadiang ban kyrshan ïa ka seng BJP”
|
Phi don ban ong eiei?