Shillong:Ka jingtrei shitom bad ka jingpynleit jingmut ia kano kano ka kam ka wanrah ia u soh ka jingjop, kane ka paw ha ki kam uwei u samla na ka Shnong Mawtneng Ri Bhoi District, u samla Kitboklang Shlem, u la lah ban shna ia ka bike kaba itynnad tang da kaba lum ia ki tiar ki tar na ka Scooter kaba la rim.
Ha ka jingleit ban ia kynduh ia une u samla Kitboklang Shlem u la iathuh ba ka jingsngewtynnad jong u naduh ba u dang rit ka long ban shna kai ia ki kali bad kane ka la paw ruh ar snem mynshwa kaba u la lah ban shna ia kawei ka kali dieng kaba la iasyriem bad ki kali ba mynta ha ka jingdon ki tiar ki tar.
Haba iakren halor ka jingshna ia kane ka bike u la iathuh ba dei, na ka jingduh kali kaba u don ka la buh ia u ha ka jingeh ba un wan un leit trei bad namar ka don ka Scooter kaba la rim bad duh ha ing kumta u la sdang ban shna pynitynnad da kaba shim ia ki tiar jong ka Scooter bad pynwandur sha ka bike kaba ia syriem bad ki bike remdor mynta.
“Nga duh ka kali, te ka don ka scooter jongnga ha ing kaba la rim te nga pyrkhat ban shna kai noh da ka bike bad ngan suk ka leit ka wan, bad nga ioh por ban shna tang por janmied ynda nga la dep ka kam bylla lade bad ka shimpor tang ar taiew eiei ban pyndep ia kane” u la ong.
U la iathuh ba na scooter u la shim ia ki katto katne ki tiar ki tar kynthup ia ka engine, ka seat, ka headlight, ka top umphiang kaba la pynwandur dur na ka tin ba kah ia ka engine jong ka scooter.
“Kiwei Kiwei nga la pynwandur da ki nar, u jingbat da ki kynja pipe, ka tyre ka dei jong ka maruti car bad kiwei kiwei pat nga shim na ki bike ba la duh” u la ong.
U la iathuh ba ka la shimpor ar taiew ba un pynwandur ia kane ka bike bad ka jinglut kaba ym pat lah ban batai namar ba u dang pyndonkam da ki tiar kiba u don lupa kiba u la lum nangne nagngtei.
U bah Kitboklang Shlem u la pynpaw ia ka jingangnud ban dang bteng ia kane ka kam lada u ioh ka lad ka lynti kaba biang khnang ba un dang kham pyntbit ha kane ka kam.
“Nga don ka jingmut ban dang pynbha ialade ha kane ka kam namar ka dei ka kam kaba nga sngewtynnad ban leh , ngam Shem la ioh jinghikai eiei re hynrei nga shu pyrkhat hi bad nga sngewtynnad ban pyrshang ban shna” u la ong .
“Lada nga ioh ka lad nga kwah ban pynbha shuh shuh ha kane ka kam” u la bynrap.
Phi don ban ong eiei?