Ka samla Nadia kum ka Puron ka phlim “Dhaka Escape”

Shillong: Ka samla Nadia Mary Syiemlieh ka la shah jied kum ka Puron lam khmat ha ka phlim khasi kaba la ai kyrteng Dhaka Escape.

Ka samla Nadia kaba dang 25 snem ka rta ka dei kaba shong basah ha Byrwa, Umsning Constituency, Ri-bhoi District ka dei kaba la jop ia ka Miss Winter Wonderland 2017 kaba la pyniaid da ka Fashion Society Shillong. Ka la jop ia ka National Pageant jong ka Miss India Glamour 2018 ha Guwahati bad mihkhmat ia ka ri India na ka bynta ka Miss Queen of the University kaba la long ha Johannnesburg, South Africa bad rah syndon ia ka nam lahduh.

Katba ka samla Alice Kharbani kaba dei ka nonghikai skul ha Nongstoin, West Khasi Hills District ka la shah jied kum ka Puron synran ba hakhmat (Supporting actress) na ki 12 ngut ki supporting actress kiba la dep shah jied.
Ia kane ka Dhaka Escape la pynmih da ka Chwa Syiemlieh Film Production bad la Direct da u bah Ban Lyngba katba u main actor la dep jied ia u ïarap Biam uba dei u samla na Jaintia Hillls.
Ka jingshah jied ia ka Nadia Syiemlieh kum ka Puron ka dei hadien ba la bishar bniah naduh ba leh ia ka jingwad sap (audition) ha ka 6 tarik Naitung 2019 ha Khasi National Khasi Dorbar Halls, Mawkhar ha kaba palat 120 ngut ki samla kynthei bad shynrang ki longkmie bad ki longkpa ki la wan pyni ia la ka jong ka sap.
Shuh shuh na ki 60 ngut ki samla kynthei kiba la wan, ki nongbishar bad u Director ki la shim satang ia ki lai ngut ban leh ‘audition’ biang ban peit bniah ia ka rynieng ryniot, ka dur ka dur bad ka rukom kren bad ka rukom ak bad mynta ki la pynbna ba ka kyrteng jong ka Nadia ka biang bha ban long kum ka puron ha kane ka phlim ka ban leit ringdur ha Dhaka ka nongbah jong ka Bangladesh.
Na kine ki 120 ngut kiba la wan audition ka Chwa Syiemlieh Film Production ka la pyntip ba ka la jied ia baroh namar ha kane ka phlim ka donkam bun briew khamtam ia ki kynthei.
Ka jingai kyrteng “Dhaka Escape” ka dei namar u actor u hap ban leit pyllait im ia ki samla kynthei jong ki jylla North East India kiba la shah khaii be-ain (human trafficking) sha Bangladesh.
Ka jingpynmih ka Chwa Syiemlieh Film Production ia ka phlim “Dhaka Escape” ka dei hadien ba ka phlim “JINGIM” la dep ringdur lut kaba sah mynta satang ban leit buh noh ia ka syrnod ha Bijou cinema khnag ban ioh ban pyni noh sha ki paidbah ka jylla.